گلوکارہ سننداشرما کو ہراساں کرنے پر معروف میوزک پروڈیوسر گرفتار

ممبئی(قدرت روزنامہ) بھارت کے معروف میوزک پروڈیوسر اور ’میڈ فار میوزک‘ کمپنی کے مالک پنکی دھالیوال کو گلوکارہ سنندا شرما کے خلاف بدسلوکی اور مالی استحصال کے سنگین الزامات پر گرفتار کر لیا گیا۔

غیر ملکی کبر ایجنسی کے مطابق یہ کارروائی پنجاب اسٹیٹ کمیشن فار وومن کی چیئرپرسن راج لالی گل کے سوموٹو نوٹس جاری کرنے کے بعد عمل میں آئی۔

معروف پنجابی گلوکارہ سنندا شرما نے اپنے انسٹاگرام پر ایک پوسٹ کے ذریعے پنکی دھالیوال پر کئی سال تک اپنی ادائیگیوں کو روکنے اور ذہنی دباؤ ڈالنے کے الزامات عائد کیے۔

گلوکارہ سنندا شرما نے کہا کہ ’’میں ایک آزاد فنکارہ ہوں اور کسی بھی فرد یا ادارے کو میرے پیشہ ورانہ معاملات میں مداخلت کرنے کی اجازت نہیں دی ہے۔ میرے پاس کسی کمپنی کے ساتھ کوئی معاہدہ نہیں ہے، اور جو بھی ایسے دعوے کر رہا ہے، وہ جھوٹے اور غیر قانونی ہیں۔‘‘

انہوں نے واضح کیا کہ وہ کسی بھی غیر مجاز ڈیلنگ کے لیے ذمے دار نہیں ہوں گی، اور جو بھی ان کے کام میں رکاوٹ ڈالنے کی کوشش کرے گا، اس کے خلاف قانونی کارروائی کی جائے گی۔

گلوکارہ نے بھارتی پنجاب کے وزیر اعلی سے اپیل کرتے ہوئے کہا کہ ’’میں ایک نوجوان فنکارہ ہوں جو پنجاب کا نام روشن کر رہی ہوں، لیکن کچھ لالچی افراد میری ترقی میں رکاوٹ بن رہے ہیں۔ میں انصاف اور تحفظ کی امید کرتی ہوں۔‘‘