چیمپئنز ٹرافی میں جیت کے بعد کوہلی اور انوشکا شرما نے کیا کیا؟ ویڈیو وائرل
دبئی (قدرت روزنامہ) گزشتہ روز بھارت نے نیوزی لینڈ کو 4 وکٹوں سے شکست دیکر چیمپئنز ٹرافی 2025 اپنے نام کرلی، بھارت نے تیسری مرتبہ یہ ٹورنامنٹ اپنے نام کیا ہے۔
بھارتی ٹیم نے فتح کے بعد خوب جشن منایا، ویرات کوہلی کی اہلیہ انوشکا شرما بھی گراونڈ میں موجود تھیں ، شائقین کے لیے یہ کسی خوشی سے کم نہ تھا جب ویرات کوہلی اور روہت شرما میدان میں وکٹوں کے ساتھ ڈانڈیا کرتے نظر آئے، دونوں کے چہروں پر مسکراہٹیں بکھری ہوئی تھیں۔
میدان میں اس دلچسپ جشن کے علاوہ، ویرات کوہلی اور ان کی اہلیہ، اداکارہ انوشکا شرما کے درمیان کئی خوبصورت لمحات بھی دیکھنے کو ملے، جنہوں نے انٹرنیٹ صارفین کو دیوانہ بنا دیا۔
ایک وائرل ویڈیو میں، ویرات کوہلی انوشکا شرما کے ساتھ کھڑے ہوئے نظر آئے، ان کا ہاتھ انوشکا کے کندھے پر تھا، اور دونوں گفتگو میں محو تھے۔
جیت کی خوشی میں سرشار ویرات نے اچانک ٹھمکے لگانے شروع کر دیے، جس پر انوشکا مسکرا اٹھیں، اس سے کچھ لمحے قبل، کیمروں نے ایک شاندار منظر قید کیا جب ویرات سیدھا اسٹینڈز کی طرف دوڑے اور ٹیم انڈیا کی جیت کے فوراً بعد انوشکا کو گلے لگا لیا۔
View this post on Instagram
اس جذباتی لمحے کی ویڈیو نے سوشل میڈیا پر طوفان برپا کر دیا اور صارفین نے اس جوڑی کو “رب نے بنا دی جوڑی” قرار دیا، جو دلچسپ بات یہ ہے کہ انوشکا کی ڈیبیو فلم کا بھی عنوان تھا۔
ویرات اور انوشکا کی اس دلکش ویڈیو کے تبصروں میں ایک صارف نے خوشی سے لکھا کہ واقعی رب نے بنا دی جوڑی، کیا خوبصورت جوڑا ہے۔
ایک اور نیٹیزن نے تبصرہ کیا کہ ویرات انوشکا کے ساتھ ہوتے ہیں تو اور بھی معصوم اور پیارے لگتے ہیں، بندہ سب کچھ چھوڑ کر بس ان کے پاس پہنچ جاتا ہے، ویسے چیمپئن کو مبارک ہو۔
ایک اور صارف نے لکھا کہ میں بہت کم سیلیبرٹی جوڑوں کے بارے میں جذباتی ہوتا ہوں لیکن خدا کی قسم اگر ان دونوں کے ساتھ کچھ غلط ہوا تو میں محبت پر یقین کرنا چھوڑ دوں گا۔
ایک مداح نے دلچسپ انداز میں کہا کہ ویرات انوشکا کے ساتھ ہوتے ہیں تو ان کا دہلی والا ٹف گائے والا انداز ختم ہو جاتا ہے اور وہ ایک مکمل معصوم اور خوش مزاج شخصیت میں ڈھل جاتے ہیں، یہ بہت خوبصورت ہے۔