بلوچستان ٹرین حادثہ: پنجابی کلچر دیہاڑ ملتوی، عظمٰی بخاری نے نئی تاریخ بتا دی

لاہور(قدرت روزنامہ) وزیراطلاعات پنجاب عظمٰی بخاری نے کہا ہے کہ 14 مارچ کو منعقد ہونے والا پنجابی کلچر میلہ ملتوی کر دیا گیا ہے۔

تفصیلات کے مطابق وزیر اطلاعات پنجاب نے اپنے ویڈیو پیغام میں کہا کہ ملک کے موجودہ حالات کے پیش نظر فیسٹیول کو مؤخر کیا جا رہا ہے۔عظمیٰ بخاری نے وضاحت کی کہ بلوچستان میں پیش آنے والے ٹرین حادثے اور احترامِ رمضان کے باعث یہ فیصلہ کیا گیا ہے۔ تاہم، پنجابی کلچر فیسٹیول اب 14 اپریل کو منعقد ہوگا۔

انہوں نے امید ظاہر کی کہ جعفرآباد میں ٹرین میں پھنسے افراد بحفاظت اپنے گھروں کو پہنچ جائیں گے۔وزیر اطلاعات نے اس عزم کا اظہار کیا کہ 14 اپریل کو پنجاب کلچر ڈے پورے جوش و خروش کے ساتھ منایا جائے گا، اور پنجابی ثقافت کے رنگ بھرپور انداز میں اجاگر کیے جائیں گے۔