ٹی ڈی سی پی ڈبل ڈیکر بس کے کرایوں میں اضافے کا نوٹیفکیشن واپس لے لیاگیا

لاہور ( قدرت روزنامہ )وزیراعلیٰ پنجاب مریم نواز نے ٹی ڈی سی پی ڈبل ڈیکر بس کے کرایوں میں اضافہ مسترد کردیا۔

تفصیلات کے مطابق وزیراعلیٰ مریم نواز کے حکم پر کرایوں میں اضافے کا نوٹیفکیشن واپس لے لیاگیا۔ٹورازم ڈویلپمنٹ کارپوریشن پنجاب کی سائٹ سی ان لاہور بس سروس کے کرائے میں 200سے500روپے تک اضافہ کیاگیا تھا۔کارپوریٹ سیکٹر،تعلیمی اداروں،کمرشل ایکٹیویٹیز کیلئے کرایوں میں 5 ہزار سے 20ہزار تک اضافہ تجویز کیاگیا تھا۔

وزیراعلیٰ پنجاب مریم نواز نے لاہور کی سیاحت کیلئے 3روٹ پر چلنے والی بس کے کرائے میں اضافے پر اظہار ناپسندیدگی کیا۔وزیراعلیٰ نے متعلقہ ٹی ڈی سی پی حکام کو کرایوں میں اضافہ واپس لینے کی ہدایت کی ہے۔وزیراعلیٰ کی ہدایت پر ٹی ڈی سی پی ڈبل ڈیکر بس کے پرانے کرائے بحال کردیئے گئے ہیں۔

وزیراعلیٰ مریم نواز نے کہاکہ ڈبل ڈیکر بس سروس عوام کی سیر و تفریح کیلئے شرو ع کی گئی ہے۔ڈبل ڈیکر بس کے کرایوں میں اضافے سے عوام پر بوجھ پڑے گا۔عوام کو سیر و سیاحت کی بہترین سہولتیں کم از کم چارجز پر مہیا کررہے ہیں اورکرتے رہیں گے۔