کاجول اور رانی کے چچا ، مشہور سمرتھ مکھرجی خاندان کے اداکار دیب مکھرجی چل بسے

ممبئی (قدرت روزنامہ) معروف اداکار اور فلمساز دیب مکھرجی طویل علالت کے بعد جمعہ کی صبح ممبئی کے مضافاتی علاقے میں واقع اپنی رہائش گاہ پر چل بسے۔ ان کی عمر 83 برس تھی۔ دیب مکھرجی کے نمائندے کی جانب سے جاری کردہ بیان میں کہا گیا، “ہم انتہائی افسوس کے ساتھ آپ کو یہ اطلاع دے رہے ہیں کہ اداکار دیبو مکھرجی، جو نارتھ بمبئی درگا پوجا کے ایک اہم رکن بھی تھے، آج صبح ہمیں چھوڑ کر چلے گئے۔” ان کی آخری رسومات ممبئی کے جوہو میں واقع پاون ہنس شمشان گھاٹ میں ادا کی گئیں۔

پریس ٹرسٹ آف انڈیا کے مطابق دیب مکھرجی نے 1960 اور 1970 کی دہائی میں کئی مشہور فلموں میں معاون کردار ادا کیے، جن میں تو ہی میری زندگی، ابھی نیتری، دو آنکھیں، باتوں باتوں میں، جو جیتا وہی سکندر، کنگ انکل اور کمینے شامل ہیں۔ 1983 میں انہوں نے مشہور اداکار متھن چکرورتی، کاجل کرن اور یوگیتا بالی کو لے کر فلم کراٹے پروڈیوس اور ڈائریکٹ کی تھی۔

دیب مکھرجی کا تعلق مشہور سمرتھ مکھرجی خاندان سے تھا۔ وہ ہدایت کار اشوتوش گواریکر کے سسر اور بالی وڈ اداکاراؤں کاجول اور رانی مکھرجی کے چچا تھے۔ ان کی والدہ ستی دیوی لیجنڈری اداکاروں اشوک کمار، انوپ کمار اور کشور کمار کی اکلوتی بہن تھیں۔ ان کے بھائیوں میں جوائے مکھرجی (اداکار و فلمساز) اور شومو مکھرجی شامل تھے، جو اداکارہ تنوجا کے شوہر اور کاجول کے والد تھے۔

دیب مکھرجی نے دو شادیاں کیں۔ ان کی پہلی شادی سے ان کی بیٹی سونیتا ہیں، جو ہدایت کار اشوتوش گواریکر کی اہلیہ ہیں، جبکہ ان کے دوسرے بیٹے ایان مکھرجی مشہور فلمساز ہیں۔ان کی آخری رسومات میں کئی مشہور شخصیات نے شرکت کی، جن میں کاجول، رانی مکھرجی، جیا بچن، عالیہ بھٹ، رنبیر کپور، ریتک روشن اور دیگر قریبی رشتہ دار و دوست شامل تھے۔