الحمد للّٰہ۔۔۔ ملک ترقی کی راہ پر چل نکلا،مہنگائی اور پالیسی ریٹ میں کمی عوام کے سامنے ہیں : حمزہ شہباز

لاہور ( قدرت روزنامہ ) سابق وزیراعلیٰ پنجاب حمزہ شہباز نے کہا ہے کہ الحمد للّٰہ، وزیراعظم شہباز شریف کی قیادت میں ملک ترقی کی راہ پر چل نکلا ہے۔ مہنگائی اور پالیسی ریٹ میں کمی عوام کے سامنے ہیں۔

“جنگ ” کے مطابق حمزہ شہباز نے شملہ پہاڑی علاقے میں پارٹی کارکن گڈو شاہ کی وفات پر اہلخانہ سے تعزیت کی اور گھر کے باہر کارکنوں سے گفتگو کی اور کہا کہ گڈو شاہ ایک محنتی اور ایماندار کارکن تھے، انہوں نے پارٹی کےلیے بہت خدمات انجام دیں۔

سابق وزیراعلیٰ پنجاب نے مزید کہا کہ الحمد للّٰہ، وزیراعظم شہباز شریف کی قیادت میں ملک ترقی کی راہ پر چل نکلا ہے۔ دہشت گردی کے مکمل خاتمے کےلیے پوری قوم افواج پاکستان کے شانہ بشانہ کھڑی ہے، دہشت گردی واقعات کی شدید مذمت کرتا ہوں۔جب تک ملک میں مکمل طور پر امن قائم نہیں ہوگا ترقی کا خواب شرمندہ تعبیر نہیں ہوگا۔ رواں ماہ ترسیلات زر 13 اعشاریہ 1 ارب ڈالر تک پہنچ گئے ہیں، جو خوش آئند بات ہے، اسی تیزی سے ہمیں اپنی برآمدات کو بڑھانا ہے۔معاشی شعبہ سے منسلک اداروں کی کارکردگی اور معاملات تسلی بخش ہیں، شہباز شریف کی قیادت میں مہنگائی اور پالیسی ریٹ میں کمی جیسے اقدامات عوام کے سامنے ہیں۔

حمزہ شہباز نے کہا کہ ہم عوام کے نمائندے ہیں اور ان کی خدمت کرنے آئے ہیں، ہمیں تیزی سے آگے بڑھنا ہے اور منزل کو حاصل کرنا ہے۔