ہر قسم کی منافرت کیخلاف آواز اٹھانا ضروری ، پائیدار عالمی امن کیلئے سب کو اپنا کردار ادا کرنا ہوگا :وزیر اعلیٰ مریم نواز

لاہور ( قدرت روزنامہ)وزیر اعلیٰ پنجاب مریم نواز نے انسداد اسلاموفوبیا کے عالمی دن پراپنے پیغام میں کہاہے کہ دنیا بھر میں مسلمانوں کو درپیش امتیازی سلوک، نفرت اور تعصب قابل مذمت ہے۔ اقوام متحدہ کی جنرل اسمبلی میں اسلاموفوبیا کے خلاف قرارداد پیش کرکے پاکستان نے آواز اٹھائی۔ اسلام دین رحمت ہے جو امن، محبت، برداشت اور انسانی عظمت کا درس دیتا ہے۔ بدقسمتی سے اسلام اور مسلمانوں کے خلاف پروپیگنڈا کا رجحان پنپ رہا ہے -اسلاموفوبیا عالمی امن اور بین المذاہب ہم آہنگی کے لیے ایک خطرہ ہے۔اسلاموفوبیا کے خاتمے کی ہر کاوش کو سراہتے ہیں۔

وزیراعلیٰ مریم نواز نے کہاکہ اقوام متحدہ اور تمام عالمی اداے نفرت انگیز رویوں کے خلاف مؤثر اور یقینی اقدامات کریں – اقوام عالم کشمیر، فلسطین اور دیگر مسلمانوں کے جان، مال،حقوق اور عزت و وقار کے تحفظ کو یقینی بنائے –

وزیراعلیٰ مریم نواز نے کہاکہ پنجاب حکومت مذہبی ہم آہنگی اور اقلیتوں کے احترام کو فروغ دینے کے لیے ہر ممکن اقدامات کر رہی ہے۔ایسا پنجاب چاہتے ہیں جہاں ہر مذہب اور مسلک کو مساوی حقوق اور عزت حاصل ہو۔اسلامی فوبیا سے نمٹنے کیلئے دنیا کو اسلام کے حقیقی تشخص سے روشناس کرایا جائے۔ ہر قسم کی منافرت کے خلاف آواز اٹھانا ضروری ہے – پائیدار عالمی امن کیلئے سب کو اپنا کردار ادا کرنا ہوگا –