بلوچستان واقعات میں ملوث ’را‘ دہشتگردوں کی ’ماں‘ کا کردار ادا کر رہی ہے، رانا ثنا اللہ

اسلام آباد (قدرت روزنامہ)وزیراعظم شہباز شریف کے مشیر رانا ثنا اللہ نے کہا ہے کہ بھارتی خفیہ ایجنسی ’را‘ دہشتگردوں کی ماں کا کردار ادا کررہی ہے جو بلوچستان میں ہونے والے دہشتگردی کے واقعات میں ملوث ہے۔
فیصل آباد میں میڈیا سے گفتگو کرتے ہوئے رانا ثنااللہ نے کہا کہ حالیہ واقعے میں تمام دہشتگردوں کو ہلاک اوور تمام افراد کو بازیاب کروایا جا چکا ہے، دہشتگردی کےلیے افغان سرزمین کا استعمال ہونا افسوسناک ہے، افغان حکومت کو دہشتگردوں کے خلاف کارروائی کرنی ہوگی۔
انہوں نے کہا کہ بلوچستان میں دہشتگردوں کے خلاف انٹیلی جنس بیسڈ آپریشن ہو رہے ہیں، بلوچستان میں کوئی بڑا آپریشن نہیں ہو رہا، خفیہ معلومات کی بنیاد پر دہشتگردوں کیخلاف روزانہ آپریشن ہو رہے ہیں، جس سے دہشتگردوں کا قلع قمع بھی کیا جا رہا ہے۔
ان کا کہنا تھا کہ قومی وقار اور سلامتی کے خلاف تمام سازشیں ناکام بنائیں گے، دہشتگردی پر جو پروپیگنڈا بھارت کررہا ہے وہی ایک مخصوص سیاسی جماعت بھی کررہی ہے۔