دو میچ ہار گئے لوگ ناراض ہیں، ہم اصل تیاری ایشیا کپ اور ورلڈکپ کی کر رہے ہیں: ہیڈ کوچ قومی ٹیم

اسلام آباد (قدرت روزنامہ)پاکستان کرکٹ ٹیم کے عبوری ہیڈ کوچ عاقب جاوید کا کہنا ہے ٹیم کی تشکیل نو کے مرحلے سے گزرنے کا مقصد یہ نہیں کہ جیتنا نہیں ہے۔
آکلینڈ میں میڈیا سے گفتگو کرتے ہوئے عاقب جاوید کا کہنا تھا پاکستان ٹیم کم بیک کرے گی اور ٹیم سیریز جیتنے کی پوری صلاحیت رکھتی ہے، تیسرے ٹی ٹوئنٹی میں ممکن ہے ایک سے دو تبدیلیاں کی جائیں۔
ان کا کہنا تھا تشکیل نو کے مرحلے سے گزرنے کا مقصد یہ نہیں کہ جیتنا نہیں ہے، نیوزی لینڈ کی کنڈیشن میں کھیلنا آسان نہیں ہوتا، جن کھلاڑیوں نے ملک سے باہر کم کرکٹ کھیلی ہو تو مسائل ہوں گے۔
عاقب جاوید کا کہنا تھا دو میچ ہار گئے تو لوگ ناراض ہیں، لوگ ہر وقت جیتتے ہوئے دیکھنا چاہتے ہیں، ہم بھی یہ ہی چاہتے ہیں لیکن کبھی تھوڑی دیر ہو جاتی ہے۔
انہوں نے کہا کہ سرفراز کی کپتانی والی بات 4 سال پرانی ہو گئی، جو ٹیم ٹی ٹوئنٹی میں بہتر تھی اس کو بھی 2 سال ہو گئے، 2 سال میں کرکٹ بدل گئی ہے، ٹی ٹوئنٹی کی ٹیمیں الگ بننے لگی ہیں، ہم بھی ٹی ٹوئنٹی کی الگ ٹیم بنانے کی کوشش کر رہے ہیں۔
عبوری ہیڈ کوچ قومی کرکٹ ٹیم کا کہنا تھا ایشیا کپ اور ورلڈ کپ دونوں اہم ایونٹ بھارت میں ہیں، ایشیا کی وکٹوں پر لمبے اسکور ہوتے ہیں جبکہ جنوبی افریقا، نیوزی لینڈ اور آسٹریلیا کی کنڈیشن میں سیریز آسان نہیں ہوتیں، نوجوان مشکل کنڈیشن میں کھیلیں گے تو اعتماد ملے گا، کھلاڑیوں کو مشکل کنڈیشن میں کھیل کر جو اعتماد ملے گا وہ ایشیا کی کنڈیشن میں بہت کام آئے گا۔
ان کا کہنا تھا پاکستان ٹیم اصل تیاری تو ایشیا کپ اور ورلڈ کپ کی کررہی ہے، صائم ایوب اور فخر زمان جب اس ٹیم کو جوائن کریں گے تو اچھی ٹیم بن جائے گی۔
انہوں نے کہا کہ کسی بولر کو 4 چھکے پڑ جانا کوئی بڑی بات نہیں ہے، فاسٹ بولر کی کاکرکردگی بڑھتی رہنی چاہیے، شاہین شاہ آفریدی کو بھی اپنی گیم کو بڑھانا ہو گا، شاہین شاہ آفریدی کو اگر انٹرنیشنل کرکٹ میں خود کو منوانا ہے تو اس کو اور بہتر کرنا پڑے گا۔
عاقب جاوید کا کہنا تھا نیوزی لینڈ میں چھوٹی باونڈریز ہیں، پاکستانی بیٹر اگر اوپر سے اچھا اسکور کریں گے تو جیت سکتے ہیں۔