سیاسی استحکام کیلئے بانی پی ٹی آئی کو رہا کرنا ہو گا

پشاور(قدرت روزنامہ)وزیراعلیٰ خیبر پختون خوا علی امین گنڈا پور نے کہا ہے کہ سیاسی استحکام کیلئے بانی پی ٹی آئی کو رہا کرنا ہو گا۔ایک تقریب سے خطاب میں انہوں نے کہا کہ پی ٹی آئی حکومت ختم ہونے سے پہلے صوبے کے حالات نارمل تھے، اب دہشت گردی اور بدامنی بڑھ چکی ہے۔
انہوں نے کہا کہ خیبر پختون خوا ایک سو انسٹھ ارب روپے سرپلس میں ہے، پنجاب ایک سو اڑتالیس ارب روپے خسارے میں ہے۔وزیراعلیٰ خیبر پختون خوا نے کہا کہ افغانستان سے مذاکرات کیے جائیں، افغانستان سے ہزاروں کلومیٹر کی سرحد ہے بات چیت کی بات کرتا ہوں تو مخالفت کی جاتی ہے، پی ڈی ایم حکومت میں بھی طالبان سے بات کرنے کا فیصلہ ہوا، ملک میں بہتری کےلیے قومی ڈائیلاگ کی ضرورت ہے۔

ان کا کہنا تھا کہ بانی پی ٹی آئی کو رہا کئے بغیر کوئی ڈائیلاگ نہیں ہوسکتے، عوام کے بغیر کوئی لڑائی نہیں جیتی جاسکتی، دہشت گردی کے خلاف جنگ جیتنے کے لیے عوامی اعتماد ضروری ہے، عوامی رائے کے ساتھ چلنا پڑے گا۔