دہشت گردوں کو بلوچستان میں چھپنے نہیں دیں گے – وزیراعلیٰ بلوچستان
کوئٹہ(قدرت روزنامہ)وزیراعلیٰ بلوچستان میر سرفراز بگٹی نے نوشکی میں پولیس موبائل پر حملے اور منگچر میں چار مزدوروں کے بہیمانہ قتل کی شدید مذمت کی ہے۔ انہوں نے کہا کہ ان دہشت گرد کارروائیوں کے ذمہ داروں کو کیفر کردار تک پہنچایا جائے گا، اور بے گناہ پولیس اہلکاروں اور مزدوروں کا خون رائیگاں نہیں جائے گا۔
وزیراعلیٰ نے مزید کہا کہ دہشت گردوں اور ان کے سہولت کاروں کے لیے بلوچستان میں کوئی جگہ نہیں ہے، اور ریاست دشمن عناصر کو عبرت کا نشان بنایا جائے گا۔ انہوں نے سیکیورٹی فورسز کو ہدایت دی کہ دشمن عناصر کی کمر توڑ کر بلوچستان کے امن کو بحال رکھا جائے۔
میر سرفراز بگٹی نے پولیس اور سیکیورٹی فورسز کو مزید وسائل فراہم کرنے کا اعلان کرتے ہوئے کہا کہ عوام کے جان و مال کا تحفظ حکومت کی اولین ترجیح ہے اور کسی بھی قیمت پر بلوچستان کا امن خراب نہیں ہونے دیا جائے گا۔
انہوں نے واضح کیا کہ خون بہانے والوں کے خلاف سخت کارروائی عمل میں لائی جائے گی اور کسی دہشت گرد کو بلوچستان میں چھپنے نہیں دیا جائے گا۔