ملک بھر میں آج یوم پاکستان ملی جوش وجذبے سے منایا جارہاہے
اسلام آباد(قدرت روزنامہ)ملک بھر میں آج یوم پاکستان ملی جوش وجذبے سے منایا جارہاہے اور دن کے آغاز پر توپوں کی سلامی بھی دی گئی ہے۔
تفصیلات کے مطابق یوم پاکستان ملی جوش جذبے سے منایا جارہاہے جبکہ شاعر مشرق علامہ اقبال کے مزار پر گارڈز کی تبدیلی کی پر وقار تقریب بھی ہوئی۔
یومِ پاکستان کی پریڈ ایوان صدر میں ہوگی اور پاک فضائیہ کے جنگی طیاروں کی فلائی پاسٹ کی ریہرسل بھی کی ہے۔
ایوان صدر میں منعقد ہونے والی پریڈ میں غیر ملکی سفیر، اعلیٰ سول اور فوجی حکام شرکت کریں گے۔
صدر آصف علی زرداری اور وزیراعظم شہباز شریف نے قوم کو یوم پاکستان کی مبارک باد دی۔
صدر آصف زرداری نے کہا کہ بہادر مسلح افواج مادرِ وطن کے دفاع میں بڑی قربانیاں دے رہی ہیں۔
وزیراعظم شہباز شریف نے کہاکہ ایک برس میں ہم نے پاکستان کی معیشت کو پائیدار ترقی کی راہ پر گامزن کیا، قومی اتحاد سے ہم معاشی خوشحالی حاصل کر سکتے ہیں، وطن کی حفاظت میں جانیں نچھاور کرنے والے شہداء کو سلام ہے۔
