دریائے سندھ سے نہریں نکالنے کا معاملہ سنگین، پیپلزپارٹی نے تحریک چلانے کا اعلان کردیا

کراچی (قدرت روزنامہ)پنجاب حکومت کی جانب سے دریائے سندھ سے نہریں نکالنے کا معاملہ سنگین ہوگیا ہے، اور اب پاکستان پیپلزپارٹی نے تحریک چلانے کا اعلان کردیا ہے۔
پاکستان پیپلزپارٹی (پی پی پی) کے چیئرمین بلاول بھٹو نے کہا ہے کہ پانی کا مسئلہ ہمارے لیے جینے مرنے کا معاملہ ہے، دریائے سندھ سے 6 کینالز نکالنے کا معاملہ ہر فورم پر اٹھا رہے ہیں، اور اب بھرپور انداز سے تحریک شروع کریں گے۔
ایوان صدر میں صحافیوں سے غیررسمی گفتگو کرتے ہوئے انہوں نے کہاکہ حکومت کو چاہیے کہ دہشتگردی کے معاملے پر مزید اتفاق رائے پیدا کرے، ہم سب کو مل کر دہشتگردی کا خاتمہ کرنا ہوگا۔
بلاول بھٹو نے کہاکہ آئندہ وفاقی بجٹ کے حوالے سے عوام کو بہترین تجاویز دی جائیں گی، اور ہم نے تیاریاں شروع کردی ہیں۔
کسی صورت دریائے سندھ سے کینالز نکالنے کی اجازت نہیں دیں گے، مراد علی شاہ
دوسری جانب وزیراعلیٰ سندھ مراد علی شاہ نے کہا ہے کہ پنجاب کی جانب سے 2024 سے دریائے سندھ سے کینال نکالنے کی کوشش ہورہی ہے، لیکن ہم نے یہ سلسلہ روکا ہوا ہے، اور اس کی اجازت نہیں دیں گے۔
یوم پاکستان کے موقع پر مزار قائد پر میڈیا سے گفتگو کرتے ہوئے انہوں نے کہاکہ کینالز کے خلاف ہمارا احتجاج جاری ہے، کسی صورت ایسا نہیں ہونے دیں گے۔
واضح رہے کہ دریائے سندھ سے کینالز نکالنے کے معاملے پر پنجاب اور سندھ حکومت آمنے سامنے ہیں۔
گزشتہ دنوں پیپلزپارٹی کے سینیئر رہنما قمر زمان کائرہ نے کہا تھا کہ دریائے سندھ سے کینالز نکالنے کے معاملے پر پنجاب کے مؤقف میں زیادہ جان ہے، تاہم سندھ کے ساتھ ایسے ہی جذباتی ہورہے ہیں۔