ٹرمپ انتظامیہ کا 5لاکھ سے زائد تارکین وطن کی قانونی حیثیت ختم کرنے کا اعلان
واشنگٹن(قدرت روزنامہ) امریکی ٹرمپ انتظامیہ نے 5 لاکھ سے زائد تارکین وطن کی قانونی حیثیت ختم کرنے کا اعلان کردیا۔غیر ملکی خبر ایجنسی کے مطابق ٹرمپ انتظامیہ نے 5 لاکھ سے زائد تا ر کین وطن کی قانونی حیثیت ختم کرنے کا اعلان کرتے ہوئے انہیں ملک چھوڑنے کیلئے 24 اپریل تک کا وقت دیا ہے۔
صدر ڈونلڈ ٹرمپ نے ملکی تاریخ کی ملک بدری کی سب سے بڑی مہم چلانے اور خاص طور پر لاطینی امریکی ممالک سے آنیوالے تارکین وطن پر قابو پانے کاعزم ظاہر کیا۔ رپورٹ کے مطابق امریکی صدر کے حکم سے کیوبا، ہیٹی، نکاراگوا اور وینز و یلا سے آنیوالے تارکین وطن متاثر ہونگے جو سابق صدر جو بائیڈن کی جانب سے شروع کی گئی ایک سکیم کے تحت امریکہ آئے تھے۔اس حوالے سے صدارتی حکم منگل کو شائع ہونا ہے اور امریکی صدر کا حکم وفاقی رجسٹر میں شائع ہونے کے 30 دن بعد یہ افراد اپنا قانونی تحفظ کھو بیٹھیں گے۔
صدارتی حکم کا مطلب یہ ہے کہ اس پروگرام کے تحت آنیوالے تارکین وطن کو 24 اپریل تک امریکہ چھوڑنا ہوگا بشرطیکہ انہوں نے کوئی دوسری امیگریشن حیثیت حاصل نہ کر لی ہو جو انہیں ملک میں رکنے کی اجازت دے۔
رپورٹ کے مطابق ’ویلکم یو ایس‘ نامی پروگرام جو امریکہ میں پناہ کے متلاشی افراد کی مدد کرتا ہے، اس نے متاثرہ افراد پر زور دیا ہے وہ ’فوری طور پر‘ کسی امیگریشن وکیل سے مشورہ کریں۔
خبر ایجنسی کے مطابق کیوبن، ہیٹی، نکاراگوا اور وینزویلا کے شہریوں کیلئے اعلان کردہ سی ایچ این وی پروگرام جنوری 2023 میں شروع کیا گیا جس کے تحت ان ممالک سے ہر ماہ زیادہ سے زیادہ 30 ہز ا ر افراد کو 2 سال کیلئے امریکہ آنے کی اجازت دی گئی تھی۔