پی ٹی آئی والے ہماری درخواست پر بھاگ جاتے ہیں، بلاول بھٹو میں ہمت ہے تو انہیں کان سے پکڑ کر لے آئیں: عظمٰی بخاری
- لاہور (قدرت روزنامہ) وزیر اطلاعات پنجاب عظمٰی بخاری نے کہا ہے کہ پی ٹی آئی والے ہماری درخواست پر بھاگ جاتے ہیں، اگر بلاول بھٹو میں ہمت ہے تو وہ انہیں کان سے پکڑ کر لے آئیں۔ پانی کی تقسیم پر بات کرتے ہوئے انہوں نے کہا کہ پنجاب، سندھ کے پانی پر دعویٰ نہیں کر سکتا اور ہماری پانی کی مینجمنٹ پر کوئی مداخلت نہیں کر سکتا۔ صحت کے شعبے سے متعلق ان کا کہنا تھا کہ یہ مافیا کے نرغے میں ہے، لیکن کسی کو بھی مریضوں کو ادویات سے محروم کرنے کی اجازت نہیں دی جا سکتی۔ انہوں نے سرکاری ملازمین کے حوالے سے واضح کیا کہ وزیر اعلیٰ کے وژن سے ہم آہنگی نہ رکھنے والوں کے لیے محکمہ میں کوئی جگہ نہیں۔ مزید برآں، انہوں نے اعلان کیا کہ عید الفطر تک کوئی ایسا ملازم نہیں ہوگا جسے تنخواہ نہ ملے۔ آرمی چیف کی والدہ کے انتقال پر تعزیت کرتے ہوئے انہوں نے کہا کہ مائیں اللہ کی عظیم نعمت ہیں اور غم کی اس گھڑی میں وہ آرمی چیف کے ساتھ کھڑی ہیں۔ ان خیالات کا اظہار انہوں نے الحمراء میں میڈیا سے گفتگو کرتے ہوئے کیا۔ انہوں نے کہا کہ موجودہ حکومت فنونِ لطیفہ کی ترقی کے لیے بھرپور اقدامات کر رہی ہے۔ وزیراعلیٰ پنجاب نے واضح ہدایات دی ہیں کہ آرٹ اور فن کی خدمت کو ترجیح دی جائے۔انہوں نے بتایا کہ ترکی کے قونصل جنرل نے الحمرا کا دورہ کیا اور پاکستانی پینٹنگز کو بے حد سراہا۔ مزید برآں، قونصل جنرل نے اس بات کی یقین دہانی کرائی ہے کہ ترکی میں پاکستانی نوجوان فنکاروں کی پینٹنگز کی نمائش ہونی چاہیے۔
عظمیٰ بخاری نے کہا کہ موسیقی، پینٹنگ اور ڈرامہ سمیت فنونِ لطیفہ کے مختلف شعبوں میں بے پناہ کام ہو رہا ہے۔ طلباءنے 3 ماہ کے کورسز مکمل کرنے کے بعد اپنی فنکارانہ صلاحیتوں کا اظہار کیا اور شاندار پینٹنگز تیار کیں۔ وزیر اطلاعات و ثقافت نے اعلان کیا کہ پنجاب آرٹ کونسل کے زیر اہتمام گانے کے مقابلے میں اول آنے والے نوجوان کو حکومتی پلیٹ فارم سے لانچ کیا جائے گا۔ مزید برآں، 14 اپریل کو الحمرا میں کلچرل ڈے کا انعقاد کیا جائے گا تاکہ ثقافتی سرگرمیوں کو فروغ دیا جا سکے۔
انہوں نے حکومت کی تعلیمی پالیسی پر روشنی ڈالتے ہوئے کہا کہ لیپ ٹاپ اسکیم کے تحت پنجاب کے ساتھ ساتھ خیبرپختونخوا اور بلوچستان کے طلباء کو بھی اسکالرشپس دی جائیں گی۔ انہوں نے پنجاب میں جاری فلاحی منصوبوں پر بات کرتے ہوئے کہا کہ 30 لاکھ خاندانوں کو عزت و وقار کے ساتھ 10 ہزار روپے پے آرڈر دیے جا رہے ہیں، جو ایک تاریخی اقدام ہے۔صفائی مہم کے حوالے سے گفتگو کرتے ہوئے انہوں نے کہا کہ “ستھرا پنجاب” منصوبہ مختلف کمپنیوں کو آؤٹ سورس کیا گیا ہے تاکہ ملازمین کو بروقت تنخواہیں مل سکیں۔ عید الفطر سے قبل ہر ملازم کو اس کا حق دیا جائے گا۔صحت کے شعبے میں اصلاحات کا ذکر کرتے ہوئے عظمیٰ بخاری نے کہا کہ ہسپتالوں میں بائیو میٹرک سسٹم نافذ ہونا چاہیے اور سرکاری ہسپتالوں میں ڈاکٹروں کو اپنی ذمہ داریاں پوری کرنی ہوں گی۔ مریم نواز کا ہسپتالوں کا دورہ اسی سلسلے کی کڑی ہے، جہاں انہوں نے واضح کیا کہ اگر کوئی افسر کام نہیں کرے گا تو اسے گھر جانا ہوگا۔ پانی کے بحران پر روشنی ڈالتے ہوئے انہوں نے کہا کہ ملک میں پانی کی شدید کمی ہے اور پنجاب میں پانی کے ذخائر میں 41 فیصد کمی ریکارڈ کی گئی ہے۔ سندھ اور دیگر صوبوں کو بھی پانی کی بہتر مینجمنٹ پر توجہ دینی ہوگی۔ ملکی سلامتی کے حوالے سے بات کرتے ہوئے انہوں نے کہا کہ دہشت گردی کا خطرہ ہمیشہ موجود رہتا ہے، لیکن پنجاب کی سی ٹی ڈی اور قانون نافذ کرنے والے اداروں نے چھ حملوں کو ناکام بنایا ہے۔ ہمارے جوان اپنی جانوں کا نذرانہ دے رہے ہیں اور ہم پہلے بھی دہشت گردی کے خلاف جنگ جیت چکے ہیں، اب بھی کامیاب ہوں گے۔