(ن )لیگ بلوچستان کے مسائل پر فکرمند ہے،6 کینالز معاملےکی اونرشپ پیپلز پارٹی کو لینی ہی پڑے گی : رانا ثناء اللہ کھل کر بول پڑے

اسلام آباد (قدرت روزنامہ)وزیراعظم شہباز شریف کے مشیر برائے سیاسی امور رانا ثناء اللّٰہ نے کہا ہے کہ (ن )لیگ کی قیادت بلوچستان کے مسائل پر فکرمند ہے،ٹرین یرغمال بنانے والے دہشت گرد کسی قسم کی ہمدردی کے مستحق نہیں۔

“جنگ ” کے مطابق نجی ٹی وی سے گفتگو میں رانا ثناء اللّٰہ نے کہا کہ (ن )لیگ کی قیادت بلوچستان کے مسائل پر فکرمند ہے، دہشت گردوں نے ٹرین کو یرغمال بنایا اور بے گناہ لوگوں کو قتل کیا۔ ٹرین یرغمال کرکے بے گناہ لوگوں کو قتل کرنے والے دہشت گرد کسی قسم کی ہمدردی کے مستحق نہیں ہیں۔معاملہ تب بگڑے گا جب کسی ایشو پر تصادم یا ضد کی صورتحال ہو۔

رانا ثناء اللّٰہ کا کہنا تھا کہ وزیراعظم شہباز شریف سے میٹنگ میں پی پی چیئرمین بلاول بھٹو، خورشید شاہ، گورنر پنجاب اور دیگر قیادت تھی۔ وزیراعظم نے پیپلز پارٹی کو یقین دلایا کہ 6 کینالز کے معاملے پر بیٹھ کر بات کریں گے، معاملے پر جو اتفاق رائے سے فیصلہ ہوگا اس پر عمل ہوگا۔ سندھ میں 6 کینالز کے معاملے پر اونرشپ کا مسئلہ ہے،یہ اونرشپ پیپلز پارٹی کو لینی ہی پڑے گی وہ نہیں لیں گے تو کوئی اور لے گا۔ 6 کینالز پر سندھ میں جس طرح کی سیاست ہورہی ہے پیپلز پارٹی کو اس اسپیس کو کور کرنا چاہیے۔