پی ایس ایل 10 کی ٹکٹوں کی فروخت کا آغاز 3 اپریل سے ہوگا، سب سے سستی ٹکٹ کتنے روپے کی ہو گی؟
لاہور(قدرت روزنامہ) ایچ بی ایل پاکستان سپر لیگ (پی ایس ایل) سیزن 10 کے ٹکٹوں کی فروخت 3 اپریل سے شروع ہوگی۔ ٹکٹیں جمعرات کو سہ پہر 3 بجے سے آن لائن دستیاب ہوں گی جبکہ فزیکل ٹکٹ 7 اپریل سے ملک بھر کے ٹی سی ایس ایکسپریس سینٹرز پر خریدے جا سکیں گے۔آن لائن بک کیے گئے ٹکٹ ٹی سی ایس کے مقرر کردہ پک اپ مراکز سے حاصل کیے جا سکتے ہیں یا گھر پر ڈیلیوری کی سہولت بھی دستیاب ہوگی۔
ش پی ایس ایل 10 کے میچز کراچی، لاہور، ملتان اور راولپنڈی میں ہوں گے، جبکہ فائنل 18 مئی کو قذافی اسٹیڈیم لاہور میں کھیلا جائے گا۔چاروں وینیوز کے عام انکلوژر کے ٹکٹ 650 روپے میں دستیاب ہوں گے۔افتتاحی میچ، اسلام آباد یونائیٹڈ اور لاہور قلندرز کے درمیان راولپنڈی کرکٹ سٹیڈیم میں ہوگا جس کے ٹکٹ 1000 سے 8500 روپے تک دستیاب ہوں گے۔
شائقین کی دلچسپی اور مصروفیت کو مزید بڑھانے کے لیے ہر میچ کے دوران ایک ٹکٹ ریفل کا انعقاد بھی کیا جائے گا، جس میں شائقین کو دلچسپ انعامات جیتنے کا موقع ملے گا۔ مزید تفصیلات جلد جاری کی جائیں گی۔