مستونگ لک پاس کے قریب مبینہ خود کش دھماکہ، بی این پی قیادت محفوظ
مستونگ (قدرت روزنامہ) مستونگ لک پاس کے قریب مبینہ خود کش دھماکہ ہوا ہے، تاہم بلوچستان حکومت کے ترجمان کے مطابق کسی قسم کا جانی نقصان نہیں ہوا ہے۔ دھماکے کے مقام پر بلوچستان نیشنل پارٹی (بی این پی) کا دھرنہ جاری تھا، اور اس موقع پر پارٹی کے تمام رہنما، بشمول سردار اختر مینگل، محفوظ ہیں۔
ترجمان بلوچستان حکومت کے مطابق، حکومت گزشتہ رات سے بی این پی کی قیادت کے ساتھ مسلسل رابطے میں ہے۔ ایک وفد نے گزشتہ رات انتظامیہ سے ملاقات کی تھی، جس کے بعد آج حکومت کے وفد کا سردار اختر مینگل سے ملاقات کا فیصلہ کیا گیا۔
ترجمان نے مزید کہا کہ حکومت بلوچستان واقعے کی مکمل چھان بین کر رہی ہے، اور عوام کو انکوائری کے نتائج سے جلد آگاہ کیا جائے گا۔ اس کے علاوہ، انہوں نے کہا کہ دھرنے کے شرکاء، بشمول سردار اختر مینگل، دیگر قیادت اور عوام کی حفاظت حکومت کی ذمہ داری ہے۔
آخر میں، ترجمان نے بی این پی، سردار اختر مینگل اور عوام سے درخواست کی کہ وہ حکومت کے ساتھ تعاون کریں اور بات چیت کے ذریعے صورتحال کو بہتر بنانے میں مدد کریں۔
