صارفین کا مطالبہ پورا، انسٹا گرام میں ایک نیا فیچر متعارف

نیویارک(قدرت روزنامہ)انسٹا گرام نے اپنے صارفین کے لیے ایک نیا فیچر متعارف کرایا ہے۔

اب آپ انسٹا گرام پر ریلز ویڈیوز کو زیادہ تیزی سے دیکھ سکیں گے۔جی ہاں واقعی میٹا کی زیر ملکیت فوٹو شیئرنگ ایپ میں ریلز کو 2x سپیڈ سے دیکھنا ممکن ہوگا۔

اس فیچر کو استعمال کرنے کے لیے ویڈیو سکرین کو کچھ وقت کے لیے دبا کر رکھیں جس کے بعد ویڈیو کی سپیڈ بڑھ جائے گی۔

اس حوالے سے انسٹا گرام کے ایک ترجمان نے بتایا کہ اس فیچر کو تمام صارفین کے لیے متعارف کرایا جا رہا ہے۔ترجمان کے مطابق ماضی میں یہ فیچر انسٹا گرام کا حصہ نہیں تھا اور اب ہم تصدیق کر رہے ہیں کہ بہت جلد یہ تمام صارفین کو دستیاب ہوگا۔

ترجمان نے بتایا کہ اس فیچر کا صارفین کی جانب سے بہت زیادہ مطالبہ کیا جا رہا تھا۔ریلز کو زیادہ تیز رفتاری سے دیکھنے سے صارفین کو وقت بچانے میں مدد ملے گی۔

یہ فیچر اس وقت متعارف کرایا گیا ہے جب انسٹا گرام ریلز ویڈیوز کا دورانیہ 15 سیکنڈ سے بڑھا کر 3 منٹ تک کیا جاچکا ہے۔اس کے علاوہ کچھ لیکس میں عندیہ دیا گیا ہے کہ ریلز ویڈیوز کا دورانیہ 10 منٹ تک بڑھایا جاسکتا ہے۔

ایسا انسٹا گرام کی جانب سے ٹک ٹاک کی نقل کرتے ہوئے کیا جا رہا ہے۔ٹک ٹاک میں 10 منٹ طویل ویڈیوز کو پوسٹ کیا جاسکتا ہے جبکہ انہیں دوگنا زیادہ رفتار سے دیکھنا بھی ممکن ہے۔