بلوچستان پر بات کرنے سے کترانے والے لوگ کس منہ سے بلوچستان میں دھرنوں میں شرکت کررہے ہیں٬نواب زادہ جمال خان رئیسانی
کوئٹہ (قدرت روزنامہ)پیپلز پارٹی کے رہنما اور رکن قومی اسمبلی نوابزادہ جمال رئیسانی نے کہا ہے کہ قومی اسمبلی میں بلوچستان پر بات کرنے سے کترانے والے لوگ کس منہ سے بلوچستان میں دھرنوں میں شرکت کررہے ہیں۔ کیا علامہ راجہ ناصر عباس اسی جماعت سے تعلق نہیں رکھتے؟ جس کے رکن کی نشاندہی پر سرداراخترمینگل کے بولنے سے قبل ہی قومی اسمبلی کا اجلاس کورم نامکمل ہونے پر ملتوی کر دیا گیا اور وہ مستعفی ہوئے۔ یہ آج جو مگرمچھ کے آنسو بہانے اور اپنا منافق چہرہ دکھانے کیلیے وفد مستونگ پہنچا۔ ان سے پوچھتا ہوں اتنا ہی درد رکھتے ہو تو اسمبلی میں خاموش رہ کر بلوچستان کی آواز کیوں نہیں سنتے؟ وہاں تو آپ کانوں میں ہیڈ فونز ڈال کر اور ایک سرٹیفائیڈ چور کے لیے اوووو اووو کرتے نہیں تھکتے۔ کون سی پی ٹی آئی بلوچستان سے درد رکھنے کا دعویٰ کر رہی ہے جس کا وزیراعظم شدید سردی میں کوئٹہ کی سڑکوں پر انصاف کیلیے لاشیں رکھ کر دھرنا دینے والی معصوم ہزارہ ماؤں اور بیٹیوں کو بلیک میلر کہتا تھا، وہ بلوچستان کا درد رکھتے ہیں؟ خدارا بلوچستان دہشتگردی کی اس لہر میں جل رہا ہے اور اسے مسترد شدہ مردہ گھوڑے کو زندہ کرنے کی کوشش میں مزید آگ کی طرف نہ دھکیلیں اور اپنی یہ منافقت اور دہری سیاست بند کردیں۔
