پاکستانیوں کیلئے خوشخبری! ہیونڈائی ٹوسان ہائبرڈ کی لانچنگ کی تیاریاں، کون کون سے ماڈل شامل؟
لاہور(قدرت روزنامہ)ہیونڈائی ٹوسان ہائبرڈ باضابطہ طور پر پاکستان میں متعارف کروائی جا رہی ہے جو ملک میں ہائبرڈ گاڑیوں کے بڑھتے ہوئے رجحان کی ایک بڑی پیش رفت ہے۔
سال 2025 کے آغاز سے ہی پاکستان کی آٹو مارکیٹ میں خاصی سرگرمی دیکھنے کو ملی ہے، جہاں کیا اسپورٹیج ایل، گوگو باکس ای وی، جے اے سی ٹی9 ہنٹر، ایم جی ایچ ایس ٹرافی، اور اسوزو ڈی میکس جیسے ماڈلز پہلے ہی لانچ ہو چکے ہیں۔
اب ہیونڈائی بھی اپنی مقبول ایس یو وی، ٹوسان کے ہائبرڈ ماڈل کے ساتھ میدان میں اترنے والی ہے۔
دسمبر 2024 میں پاکستان میں ہیونڈائی ٹوسان ہائبرڈ کو پہلی بار دیکھا گیا تھاجس کے بعد گاڑی کے ممکنہ لانچ سے متعلق قیاس آرائیاں شروع ہو گئی تھیں۔
اس وقت کمپنی نے وضاحت کی تھی کہ وہ گاڑی نجی طور پر درآمد کی گئی ہے اور کسی باضابطہ منصوبے کا حصہ نہیں لیکن انڈسٹری کے ماہرین نے اندازہ لگایا تھا کہ ہیونڈائی جلد یا بدیر اپنی ہائبرڈ ایس یو وی ضرور متعارف کرائے گی، خاص طور پر کیا اسپورٹیج ایل جیسی مسابقتی گاڑیوں کی موجودگی میں۔
اب ہیونڈائی کی سوشل میڈیا پوسٹ نے اس حوالے سے تصدیق کر دی ہے، جس میں بتایا ہے کہ “ہیونڈائی کا انقلابی آل-ویل ڈرائیو ہائبرڈ ماڈل جلد آ رہا ہے”۔ اس سے واضح اشارہ ملتا ہے کہ ٹوسان کا ہائبرڈ، آل ویل ڈرائیو ویریئنٹ پاکستان میں لانچ کے قریب ہے۔
اگرچہ مکمل خصوصیات کا اعلان ابھی باقی ہے تاہم ذرائع کے مطابق نئی ٹوسان ہائبرڈ میں جدید ترین عالمی ماڈل، آل ویل ڈرائیو سسٹم، ملٹیپل ٹیرین موڈز، ہائبرڈ پاور ٹرین، ایڈوانس ڈرائیور اسسٹنس سسٹم اور ممکنہ طور پر لانگ وہیل بیس ورژن جیسی خصوصیات شامل ہوں گی۔
ان فیچرز کی موجودگی نہ صرف اسے پاکستان کی ہائبرڈ مارکیٹ میں ایک نمایاں اضافہ بنائے گی بلکہ ایندھن کی بچت کرنے والی ایس یو ویز کے زمرے میں صارفین کو مزید معیاری آپشنز فراہم کرے گی۔