لاہور میں جھگڑے کے دوران صلح کرانے والا شخص ہی قتل کر دیا گیا

لاہور (قدرت روزنامہ)لاہور میں جھگڑے کے دوران 50 سالہ شخص کو قتل کر دیا گیا۔ پولیس کے مطابق مقتول نوید محلے دار سے بھائی اور بھتیجوں کا جھگڑا ختم کرانے گیا تھا۔ قتل ہونے والے شخص کی سی سی ٹی وی فوٹیج سامنے آ گئی۔
نجی ٹی وی آج نیوز کے مطابق صلح صفائی کے بعد ملزم نے پیچھے سے گولی مار دی جس سے 50 سالہ شخص جاں بحق ہو گیا۔لاہور میں لڑائی جھگڑے کے دوران قتل ہونے والے شخص کی سی سی ٹی وی فوٹیج منظر عام پر آ گئی۔
50 سالہ شخص کے قتل کی کلوزسرکٹ فوٹیج میں دیکھا جا سکتا ہے کہ ملزم جمشید نے جھگڑا ختم کروانے والے نوید کو گولی ماردی۔
نوید اپنے بھائی اور بھتیجوں کا جھگڑا ختم کروانے آیا تھا۔ مسلح ملزم جمشید نے واپس پلٹتے نوید کو سر میں گولی ماری۔
ملزم قتل کی واردات کے بعد اسلحہ تھامے تسلی سے جائے وقوعہ پر کھڑا رہا، مقتول کا بھائی اور بھتیجا ملزم کے سامنے ہاتھ جوڑتے رہے۔
پولیس کے مطابق ملزم کی گرفتاری کی کوششیں جاری ہیں، واقعہ گزشتہ رات مستی گیٹ تھانے کی حدود میں پیش آیا۔