طلاق کے بعد یوزویندر چہل نے آر جے مہوش کو اپنی ریڑھ کی ہڈی قرار دے دیا

ممبئی (قدرت روزنامہ) معروف بھارتی کرکٹر یوزویندر چہل اور آر جے مہوش کے درمیان مبینہ تعلقات کی افواہیں ایک بار پھر خبروں میں ہیں۔ نیوز 18 کے مطابق چہل نے حال ہی میں آر جے مہوش کی ایک انسٹاگرام پوسٹ پر تبصرہ کرتے ہوئے انہیں ’میری ریڑھ کی ہڈی‘ قرار دیا اور ان کے مسلسل ساتھ دینے پر شکریہ ادا کیا۔

شمہوش جو ان دنوں آئی پی ایل میں پنجاب کنگز کی بھرپور حمایت کرتے ہوئے نظر آتی ہیں، نے چند روز قبل چندی گڑھ میں کھیلے گئے میچ کی تصاویر شیئر کیں، جن میں وہ چہل کی ٹیم کے لیے پرجوش انداز میں نعرے لگاتی دکھائی دیں۔ ایک تصویر میں مہوش اور چہل سیلفی لیتے بھی نظر آئے۔

اپنی پوسٹ میں مہوش نے لکھا: ’’ہر حالت میں ان کے ساتھ، جیسے ایک چٹان کی طرح! ہم سب آپ کے ساتھ ہیں ‘‘۔ جواباً چہل نے تبصرہ کیا ’’آپ سب میری ریڑھ کی ہڈی ہیں، ہمیشہ میرے ساتھ کھڑے ہونے کیلئے شکریہ ‘‘۔

یہ افواہیں دسمبر 2024 سے گردش میں ہیں، جب مہوش نے چہل اور ان کے دوستوں کے ساتھ کرسمس مناتے ہوئے ایک تصویر شیئر کی تھی۔ اس کے بعد دبئی میں چیمپئنز ٹرافی میچ کے دوران دونوں کو ایک ساتھ دیکھا گیا، اور ان کی تصاویر اور ویڈیوز سوشل میڈیا پر وائرل ہو گئیں۔

تاہم ان افواہوں پر مہوش پہلے ہی ایک طویل انسٹاگرام پوسٹ میں ردعمل دے چکی ہیں، جس میں انہوں نے ان خبروں کو بے بنیاد قرار دیتے ہوئے کہا تھا: ’’اگر آپ کسی مخالف جنس کے ساتھ نظر آئیں تو کیا آپ فوراً اس کے ساتھ ڈیٹ کر رہے ہوتے ہیں؟ یہ کون سا دور ہے؟‘‘ انہوں نے مزید کہا کہ کچھ پی آر ٹیمز ان کا نام استعمال کر کے دوسروں کی شبیہہ بچانا چاہتی ہیں، جسے وہ ہرگز برداشت نہیں کریں گی۔

واضح رہے کہ یوزویندر چہل اور ان کی ڈانسر اہلیہ دھنشری ورما میں طلاق ہوچکی ہے۔ ان کی طلاق کی خبروں کے دوران ہی یوزویندر اور مہوش کے افیئر کی خبریں سامنے آنا شروع ہوگئی تھیں۔