شادی شدہ خاتون کا بیک وقت 2 لوگوں سے معاشقہ، ایک عاشق نے چاقو مار کر قتل کردیا

نئی دہلی (قدرت روزنامہ) گڑگاؤں کے گاؤں بنولا میں ایک 24 سالہ خاتون کی ہلاکت کا لرزہ خیز واقعہ سامنے آیا ہے جہاں بظاہر ایک “پیچیدہ رشتے” نے خونریز رخ اختیار کر لیا۔ مقتولہ نیلم کے شوہر نے دعویٰ کیا ہے کہ اس کی بیوی کے دو مردوں سے تعلقات تھے، جن میں سے ایک نے اسے محض اس لیے قتل کر دیا کیونکہ وہ دوسرے مرد سے بھی تعلق رکھتی تھی۔

پولیس کے مطابق نیلم اپنے شوہر کے ساتھ بنولا گاؤں میں کرائے کے مکان میں رہتی تھی اور وہیں کام بھی کرتی تھی۔ پیر کی شام جب اس کا شوہر گھر واپس آیا تو اس نے نیلم کو ونود نامی شخص کے ساتھ جھگڑتے دیکھا۔ جھگڑے کی وجہ یہ تھی کہ نیلم کا ایک اور شخص سدھیر سے بھی تعلق تھا، جس پر ونود کو اعتراض تھا۔

نیلم نے بار بار ونود سے گھر چھوڑنے کو کہالیکن وہ طیش میں آ گیا اور قریب رکھے کچن کے چاقو سے نیلم کے پیٹ میں وار کر دیا۔ زخمی حالت میں نیلم کو فوری طور پر ریواڑی کے سول ہسپتال لے جایا گیا جہاں وہ دم توڑ گئی۔

نیوز 18 کے مطابق پولیس نے اترپردیش کے ضلع شاہجہانپور کے کنڈھواچک گاؤں سے تعلق رکھنے والے ونود کو گرفتار کر لیا۔ ملزم نے تفتیش میں اعتراف کیا کہ اس کا نیلم کے ساتھ تعلق تھا اور جب نیلم نے اس سے بےرخی برتی تو اس نے غصے میں آ کر اسے چاقو مار دیا۔