خاتون مسافر کی طبیعت خراب، دبئی سے ڈھاکا جانیوالے طیارے کی کراچی میں ایمرجنسی لینڈنگ

کراچی (قدرت روزنامہ )دبئی سے ڈھاکا کی پرواز میں سوار خاتون مسافر کی طبیعت خراب ہونے پر طیارے نے کراچی میں میڈیکل ایمرجنسی لینڈنگ کی۔
نجی ٹی وی جیو نیوز نے ایوی ایشن ذرائع کے حوالے سے بتایا کہ غیر ملکی ایئر لائن کی پرواز ایف زیڈ 501 دبئی سے ڈھاکا جارہی تھی کہ بھارتی فضائی حدود میں طیارے میں سوار ایک بنگلہ دیشی خاتون مسافر کی طبیعت خراب ہوگئی۔
پائلٹ نے انسانی ہمدردی کی بنیاد پر قریب ترین کراچی جناح انٹرنیشنل ایئرپورٹ کے ایئر ٹریفک کنٹرولر سے ایمرجنسی لینڈنگ کی اجازت طلب کی، اجازت ملنے پر بوئنگ 737 طیارے نے جناح ایئرپورٹ پر میڈیکل ایمرجنسی لینڈنگ کی۔
کراچی ایئرپورٹ پر ڈاکٹرز نے خاتون مسافر کو ہنگامی طبی امداد دی، طبیعت زیادہ خراب ہونے پر خاتون مسافر کو میڈیکل ٹیم نے نجی اسپتال منتقل کردیا۔
ایوی ایشن ذرائع کے مطابق طیارہ کراچی ایئرپورٹ پر موجود ہے جو اگلی پرواز کی تیاری میں ہے۔