اسلام آباد ہائیکورٹ بار کا اہم فیصلہ: ججز تبادلے کیخلاف سپریم کورٹ میں دائر درخواست واپس لینے کا اعلان
اسلام آباد (قدرت روزنامہ)اسلام آباد ہائیکورٹ بار ایسوسی ایشن نے ججز کے تبادلے کے خلاف سپریم کورٹ میں دائر آئینی درخواست واپس لینے کا فیصلہ کر لیا ہے۔ بار کے صدر واجد گیلانی اور سیکرٹری منظور ججہ کی جانب سے باقاعدہ اتھارٹی لیٹر جاری کیا گیا ہے، جس میں درخواست واپس لینے کی منظوری دی گئی ہے۔
یاد رہے کہ گزشتہ بار کابینہ نے اسلام آباد ہائیکورٹ کے ججز کے تبادلے اور سنیارٹی کے معاملے پر سپریم کورٹ میں فریق بننے کی درخواست دائر کی تھی۔ یہ کیس کل سپریم کورٹ میں سماعت کے لیے مقرر ہے۔
اسلام آباد ہائیکورٹ بار کی جانب سے جاری کردہ اتھارٹی لیٹر میں ایڈووکیٹ آن ریکارڈ انیس محمد شہزاد کو آئینی درخواست واپس لینے کا اختیار دیا گیا ہے۔
بار کی جانب سے درخواست واپس لینے کے فیصلے کو اہم پیشرفت قرار دیا جا رہا ہے، جو عدالتی حلقوں اور قانونی برادری کی توجہ کا مرکز بن گیا ہے۔ اس فیصلے سے آئندہ سماعت میں کیس کی نوعیت اور فریقین کے مؤقف پر ممکنہ اثرات مرتب ہو سکتے ہیں۔
