جمعیت علماءاسلام (ف) کا پی ٹی آئی کے ساتھ اتحاد نہ کرنے کا فیصلہ

اسلام آباد(قدرت روزنامہ)جمعیت علماءاسلام (ف) کا پی ٹی آئی کے ساتھ اتحاد نہ کرنے کا فیصلہ،جے یو آئی نے حتمی فیصلہ کرتے ہوئے کہا ہے کہ وہ کسی ایسے اتحاد میں شامل نہیں ہوگی جو پی ٹی آئی کے ایماءپر قائم کیا جائیگا،جمعیت علماءاسلام (ف)نے اس بات کا اعلان اپنے دوروزہ مجلس عمومی کے اختتام پر کیا، اس حوالے سے جنگ نے بتایا ہے کہ جمعیت نے فیصلہ کیا ہے کہ وہ حکومت کا حصہ نہیں بنے گی اور پارلیمنٹ میں آزاد حزب اختلاف کا کردارادا کرتی رہے گی۔
پارلیمنٹ میں زیر غوآنے و الے معاملات کاجائزہ لیتی رہے گی اورعندالضرورت تحریک انصاف کے ساتھ تعاون کرنے یا نہ کرنے کا تعین ہوگا۔ جمعیت علماءاسلام (ف)نے تحریک انصاف کی بار بار اور پرزور درخواستوں پر اس سے رازداری کے ساتھ بعض وضاحتیں طلب کی تھیں جو کئی ہفتے گزر جانے کے باوجود جواب طلب ہیں۔
جمعیت کا کہنا تھا کہ وہ حکومت کے خلاف سیاسی جماعتوں کے اشتراک سے بڑا اتحاد قائم کرنے کی خواہاں تھی جبکہ دوسری طرف وہ سٹیبلشمنٹ کے ساتھ مذاکرات میں مصروف تھی اس نے وسیع تر سیاسی اتحاد کا ڈول ڈال رکھا تھا تاکہ ان خفیہ مذاکرات میں اس کی سودا کار حیثیت مستحکم ہوسکے۔
مبصرین کا کہنا ہے کہ جمعیت العلمائے اسلام نے مولانا فضل الرحمن کی قیادت میں قومی معاملات کے بارے میں صائب فیصلے کئے ہیں۔اس کے علاوہ جمعیت علماءاسلام (ف)نے پنجاب میں نہریں نکالے جانے کے معاملے میں اپنی سندھ تنظیم کے موقف کی تائید کا فیصلہ کیا ہے اور طے کیا ہے کہ جمعیت کی مرکزی تنظیم اس بارے میں کوئی راہ عمل اختیار نہیں کرے گی۔ منرلز اور مائنز کے قانون کے سلسلے میں جمعیت العلمائے اسلام صوبوں کے آئینی مفادات کا تحفظ کرے گی۔
جمعیت العلمائے اسلام کے ذرائع نے جنگ کو یہ بھی بتایا ہے کہ جمعیت العلمائے اسلام کے زیر اہتمام 27 اپریل کو مینار پاکستان کے سبزہ زار پر ریلی کا انعقاد کیا جائیگا۔اسی طرح دس مئی کو پشاور اور سترہ مئی کو کوئٹہ میں بھی اجتماعات ہونگے۔