یمنیٰ زیدی نے ’’قرضِ جاں‘‘ میں ایک قسط کا کتنا معاوضہ لیا؟ بڑا دعویٰ

کراچی (قدرت روزنامہ) حال ہی میں اختتام پذیر ہونے والا مقبول ڈرامہ ’’قرضِ جاں‘‘ اپنے دل کو چھو لینے والے موضوع اور اداکاروں کی شاندار پرفارمنس کی بدولت مداحوں کا پسندیدہ بن چکا ہے۔ اس ڈرامے میں مرکزی کردار نبھانے والی معروف اداکارہ یمنیٰ زیدی کی اداکاری کے ساتھ ساتھ اُن کی مبینہ فیس بھی سوشل میڈیا پر زیرِ بحث ہے۔

نیوز 18 کے مطابق سوشل میڈیا پر گردش کرنے والی رپورٹس میں دعویٰ کیا گیا ہے کہ یمنیٰ زیدی نے ’’قرضِ جاں‘‘ کی ہر قسط کے عوض تقریباً دو سے تین لاکھ روپے معاوضہ لیا۔ ڈرامے کی کل اقساط 32 تھیں، اس اعتبار سے ان کا کُل معاوضہ 70 لاکھ سے ایک کروڑ روپے کے درمیان بتایا جا رہا ہے، جو پاکستانی ڈرامہ انڈسٹری میں کسی بھی اداکارہ کے لیے ایک نمایاں رقم ہے۔

یمنیٰ زیدی اس سے قبل بھی کئی سپرہٹ ڈراموں میں اپنی پرفارمنس سے ناظرین کے دل جیت چکی ہیں، جن میں ’’تیرے بن‘‘، ’’بختاور‘‘، ’’پیار کے صدقے‘‘ اور ’’صنفِ آہن‘‘ شامل ہیں۔ ’’قرضِ جاں‘‘ کے اختتام پر یمنیٰ نے سوشل میڈیا پر اپنے جذبات کا اظہار کرتے ہوئے مداحوں، ساتھی اداکاروں اور ڈائریکٹر کا شکریہ ادا کیا۔