زمین کو محفوظ بنانے کیلیے آلودگی اور موسمیاتی تبدیلیوں کے چیلنجز کا مقابلہ کرنا ہے: وزیر اعلیٰ پنجاب

لاہور ( قدرت روزنامہ )وزیراعلیٰ پنجاب مریم نواز نے کہا کہ زمین کو محفوظ بنانے کے لیے آلودگی اور موسمیاتی تبدیلیوں کے چیلنجز کا مقابلہ کرنا ہے۔پنجاب حکومت قدرتی مسکن کی حفاظت کے مشن میں سب سے آگے ہے۔ وزیر اعلیٰ مریم نواز نے ارتھ ڈے (Earth Day) پراپنے پیغام میں کہا کہ زمین صرف ہماری نہیں، آنے والی نسلوں کی بھی امانت ہے۔ زمین کے تحفظ کے لیے ہمیں قدرتی وسائل اور درختوں کو بچانا ہے۔ حکومت پنجاب نے زمینی ماحولیاتی تحفظ کو اپنی پالیسی کا مرکزی حصہ بنایا ہے۔ زمین کے تحفظ کیلئے سرسبز پنجاب مہم کے تحت لاکھوں درخت لگائے جا چکے ہیں۔

وزیراعلیٰ مریم نواز نے کہا کہ پنجاب میں پاکستان کی پہلی سمارٹ انوئرمنٹ فورس قائم کردی گئی ہے۔ کارخانوں کی نگرانی کی جارہی ہے، فصلوں کی باقیات جلانے کی روک تھام کے لیے سپر سیڈر دیئے جا رہے ہیں۔ پنجاب نے پاکستان کی پہلی جامع کلائمیٹ پالیسی متعارف کرائی ہے۔

وزیراعلیٰ مریم نواز نے کہا کہ صنعتی آلودگی پر قابو پانے کے لیے خودکار مانیٹرنگ سسٹم لارہے ہیں۔ مل جل اپنی زمین کو بہتراور سرسبز بنانے کا عزم کرتے ہیں۔