عمران خان کے شیر افضل مروت سے متعلق سخت ریمارکس، وکلا سے ملاقات کی اندرونی کہانی سامنے آگئی
اسلام آباد (قدرت روزنامہ)پاکستان تحریک انصاف (پی ٹی آئی) کے بانی عمران خان سے اڈیالہ جیل میں وکلا سے ملاقات ہوئی ہے، جس میں انہوں نے کہاکہ شکر ہے شیر افضل مروت سے ہماری جان چھوٹ گئی۔
عمران خان سے وکلا کی ملاقات کی اندرونی کہانی سامنے آگئی ہے، آج اڈیالہ جیل میں ملاقاتوں کا دن تھا، لیکن بانی پی ٹی آئی کی بہنوں کو ایک بار پھر بھائی تک رسائی نہ مل سکی۔
میڈیا رپورٹس کے مطابق عمران خان نے وکلا سے گفتگو کرتے ہوئے کہاکہ شیر افضل مروت کو پی ٹی آئی کے اندر ہمارے خلاف لانچ کیا گیا، شکر ہے جان چھوٹ گئی۔
میڈیا رپورٹس کے مطابق عمران خان نے شیر افضل مروت کی علیمہ خان سے متعلق گفتگو پر برہمی کا اظہار کیا، جبکہ وکلا کی فیسوں سے متعلق ان کی گفتگو کی بھی مذمت کی۔
میڈیا رپورٹس کے مطابق عمران خان نے مائنز اینڈ منرلز بل کے حوالے سے بات چیت کرنے کے لیے وزیراعلیٰ خیبرپختونخوا علی امین گنڈاپور کو ملاقات کے لیے بلا لیا ہے۔ بانی پی ٹی آئی کی جانب سے بل پر تحفظات کا اظہار کیا گیا۔
عمران خان نے پارٹی لیڈر شپ کو پیغام بھیجا کہ وہ تمام تر اختلافات ختم کریں، جبکہ چیئرمین پی ٹی آئی بیرسٹر گوہر کو معذرت خواہانہ رویے پر سخت پیغام بھجوایا۔
میڈیا رپورٹس کے مطابق عمران خان نے کہاکہ افغانستان کے ساتھ بات چیت میں حکومت نے دیر کردی۔
اس کے علاوہ عمران خان نے ہدایت کی ہے کہ پی ٹی آئی کے سیکریٹری جنرل سلمان اکرم راجا قانون کی عملداری نہ ہونے پر چیف جسٹس پاکستان کو خط لکھیں۔
