روڈ ٹو مکہ پراجیکٹ، سعودی عرب کا 45 رکنی وفد انتظامات کا جائزہ لینے پہنچ گیا

اسلام آباد(قدرت روزنامہ)سعودی عرب کا 45 رکنی وفد روڈ ٹو مکہ پراجیکٹ انتظامات کا جائزہ لینے کیلئے پاکستان پہنچ گیا۔ وزارت مذہبی امور کے مطابق منصوبے کے تحت 50 ہزار 500 حاجی سعودی عرب جائیں گے۔

نجی ٹی وی سما نیوز کے مطابق حج 2025ء کے سلسلے میں روڈ ٹو مکہ پراجیکٹ انتظامات کا جائزہ لینے کیلئے 45 رکنی سعودی وفد پاکستان پہنچ گیا۔ وزارت مذہبی امور کے حکام نے روڈ ٹو مکہ وفد کا اسلام آباد انٹرنیشنل ایئرپورٹ پر استقبال کیا۔

وزارت مذہبی امور کا کہنا ہے کہ روڈ ٹو مکہ پراجیکٹ کے تحت پروازوں کے ذریعے 50 ہزار 500 حاجی سعودی عرب جائیں گے، اسلام آباد سے روڈ ٹو مکہ پراجیکٹ کے تحت 28 ہزار، کراچی سے 21 ہزار حاجی سعودی عرب جائیں گے۔

حکام نے بتایا کہ اسلام آباد سے 100 اور کراچی سے 80 پروازیں آپریٹ ہوں گی، حج عازمین کیلئے اسلام آباد اور کراچی ایئرپورٹ پر کاؤنٹرز بنائے جائیں گے۔

وزارت مذہبی امور کا کہنا ہے کہ روڈ ٹو مکہ پراجیکٹ میں پاکستانی عازمین حج کی امیگریشن سعودی عرب کی بجائے پاکستان میں ہی مکمل ہوگی۔