سارہ عمیر نے اپنی ڈرامائی محبت کی کہانی شیئر کردی

لاہور(قدرت روزنامہ)سابق اداکارہ سارہ عمیر نے معروف ٹی وی ڈائریکٹر محسن طلعت کے ساتھ اپنی محبت اور شادی کی کہانی شیئر کردی۔

تفصیلات کے مطابق سارہ عمیر نے حال ہی میں ایک مارننگ شومیں شرکت کی، جہاں انہوں نے معروف ٹی وی ڈائریکٹر محسن طلعت کے ساتھ اپنی محبت بھری کہانی اور شادی کے بارے میں بات کی۔

ان کا کہنا تھا کہ، جب میں شوبز میں نئی تھی، تو میں محسن طلعت کے پاس آڈیشن دینے گئی۔ مجھے لگا کہ وہ ایک بزرگ شخص ہوں گے، لیکن جب ہم ان کے دفتر پہنچے، تو میں نے ایک نوجوان کو بیٹھا دیکھا۔ میں نے کہا، ’مجھے آپ کے ڈائریکٹر سے بات کرنی ہے‘، تو انہوں نے کہا، ’ہاں، میں ہی محسن طلعت ہوں‘۔ تو میں آڈیشن دینے گئی، لیکن آخرکار دل دے بیٹھی۔

سارہ نے محسن طلعت کو پسند کرنے کی وجہ بتائی کہ ان کی باتوں کا انداز بہت میٹھا تھا، جو کہ ایک نظر میں محبت کا باعث بنا۔سارہ نے کہا، یہ محبت پہلی نظر میں ہوئی۔ ان کا لب و لہجہ بہت میٹھا اور شیریں تھا، اور یہی بات مجھے ان کی طرف کھینچ لائی۔

انہوں نے مزید کہا، مردوں میں یہ بات کم ہی دیکھی جاتی ہے۔ میری فیملی میں زیادہ تر اونچی آواز والے لوگ ہیں، لیکن محسن سے مل کر میری سوچ بدل گئی۔

سارہ عمیر نے اپنی شادی کے کامیاب ہونے کی ایک بڑی وجہ اپنے شوہر کی صبر و تحمل کو قرار دیا۔ان کا کہنا تھا، ”ہم نے بہت سی مشکلات کا سامنا کیا، لیکن اللہ کی مدد سے ہم کامیاب ہوئے۔“