چالیس سالہ خاتون ٹیچر کا 16 سالہ بچے کا جنسی استحصال کا واقعہ سامنے آگیا

ممبئی(قدرت روزنامہ)ممبئی کے ایک معروف اسکول کی 40 سالہ خاتون ٹیچر کو 16 سالہ طالب علم سے متعدد بار جنسی استحصال کرنے کے الزام میں گرفتار کر لیا گیا ہے۔ پولیس حکام کے مطابق، خاتون ٹیچر شادی شدہ ہیں اور بچوں کی والدہ بھی ہیں۔ ان کے خلاف بچوں کے جنسی استحصال سے تحفظ کے قانون (POCSO) کے تحت مقدمہ درج کیا گیا ہے۔
پولیس کے مطابق، خاتون ٹیچر نے گزشتہ ایک سال کے دوران طالب علم کو ہراساں کیا۔ اس دوران، اسکول کے سالانہ فنکشن کے لیے ڈانس گروپ بنانے کی میٹنگز کے دوران، خاتون ٹیچر نے طالب علم کو نازیبا اشارے کیے اور مختلف مواقع پر اس کا جنسی استحصال کیا، جس کے نتیجے میں طالب علم ذہنی دباؤ کا شکار ہو گیا۔
یہ معاملہ اس وقت سامنے آیا جب طالب علم کے اہل خانہ نے اس کے رویے میں تبدیلی محسوس کی۔ طالب علم نے اپنے والدین کو تمام واقعہ سے آگاہ کیا، جس کے بعد اہل خانہ نے پولیس سے رابطہ کیا اور خاتون ٹیچر کے خلاف شکایت درج کروائی۔ پولیس نے خاتون ٹیچر کو گرفتار کر لیا ہے اور تحقیقات جاری ہیں۔