عوام کیلئے خوشخبری! ایمریٹس ایئرلائنز میں نوکری کے مواقع، پاکستانی اپلائی کرنے کا طریقہ جان لیں

دبئی(قدرت روزنامہ)دبئی سے تعلق رکھنے والی معروف بین الاقوامی فضائی کمپنی ایمرٹس ایئرلائنز نے 2025 کے لیے اپنے کیبن کریو کی عالمی بھرتی مہم کا باضابطہ آغاز کر دیا ہے۔
دنیا بھر میں سفر اور خدمات کے میدان میں شہرت رکھنے والی اس ایئرلائن نے باصلاحیت اور خدمت کے جذبے سے سرشار افراد کو دعوت دی ہے کہ وہ آن لائن درخواست دے کر اس عالمی معیار کی ٹیم کا حصہ بنیں۔
ایمرٹس ایئرلائنز کی جانب سے یہ بھرتی مہم فضائی خدمات کے بین الاقوامی دائرہ کار کو مزید وسعت دینے کی حکمتِ عملی کا حصہ ہے، جس کے تحت مختلف ممالک سے قابل اور پرجوش افراد کو اپنی ٹیم میں شامل کیا جائے گا۔
سوشل میڈیا پر جاری پیغام میں ایمرٹس نے کہا ہے کہ کیبن کریو بننا صرف یونیفارم پہننا نہیں بلکہ ایک مکمل طرزِ زندگی ہے۔
ایمرٹس گروپ کی آفیشل ویب سائٹ پر اس وقت 180 سے زائد مختلف آسامیوں کے لیے درخواستیں وصول کی جا رہی ہیں، جو نہ صرف ایمرٹس بلکہ اس کی ذیلی کمپنیوں میں بھی دستیاب ہیں۔
یہ بھرتی مختلف بین الاقوامی شہروں اور دبئی میں منعقدہ ہفتہ وار ایونٹس کے ذریعے کی جا رہی ہے، جہاں منتخب افراد کو ان کے قریبی مقام پر ہونے والے اسیسمنٹ سیشن کے لیے بلایا جائے گا۔
ایمرٹس کیبن کریو بننے کے خواہش مند افراد کے لیے مخصوص اہلیت کے معیار مقرر کیے گئے ہیں۔ درخواست دہندہ کی عمر کم از کم 21 سال ہونی چاہیے، جب کہ قد کم از کم 160 سینٹی میٹر ہونا ضروری ہے۔
انگریزی زبان میں روانی سے بات کرنے اور لکھنے کی مہارت لازمی ہے، اور دیگر زبانوں کی معلومات کو اضافی خوبی تصور کیا جاتا ہے۔
امیدوار کے پاس کم از کم ایک سال کا مہمان داری یا کسٹمر سروس کا تجربہ ہونا چاہیے، اور کم از کم ہائی اسکول یعنی بارہویں جماعت تک تعلیم مکمل ہونا لازم ہے۔
مزید برآں امیدوار کے جسم پر یونیفارم پہنے ہوئے کسی قسم کا نمایاں ٹیٹو نہیں ہونا چاہیے اور اسے متحدہ عرب امارات کے ویزا قوانین پر بھی پورا اترنا ہوگا۔
ایمرٹس ایئرلائنز کی نوکریاں محض روزگار کا ذریعہ نہیں بلکہ عالمی سفر، ثقافتی ہم آہنگی، اور پیشہ ورانہ ترقی کے مواقع فراہم کرتی ہیں۔
کامیاب امیدواروں کو جامع تربیت، ٹیکس سے پاک تنخواہیں اور کمپنی کے عالمی نیٹ ورک کے تحت سفر کی سہولتیں دی جائیں گی۔
ایمرٹس کی اوپن ڈے بھرتی کی تقریبات رواں ماہ جولائی میں سڈنی، برلن، برسلز، اور وینکوور سمیت کئی بین الاقوامی شہروں میں منعقد ہوں گی تاکہ بہترین عالمی ٹیلنٹ کو اپنی ٹیم میں شامل کیا جا سکے۔
اگر آپ ایڈونچر اور معیار سے بھرپور ایک شاندار کیریئر کے خواہاں ہیں، تو ایمرٹس ایئرلائنز کے ساتھ کیبن کریو کی ملازمت آپ کے لیے دنیا بھر کے امکانات کے دروازے کھول سکتی ہے۔