میزان بینک نے پاکستان کی پہلی ای سم متعارف کروا دی! حاصل کرنے کا آسان طریقہ جانیں

کراچی(قدرت روزنامہ)میزان بینک نے ملک میں ایک نئی تاریخ رقم کرتے ہوئے اپنے وی آئی پی درجے کے صارفین کے لیے جدید ترین ڈیجیٹل سہولت متعارف کروا دی ہے۔
میزان بینک وہ پہلا پاکستانی بینک بن گیا ہے جس نے ویزا کمپنی کی جدید ترین ٹیکنالوجی عالمی ای سم کو اپنے وی آئی پی درجے کے ڈیبٹ کارڈ میں شامل کیا ہے جس کا مقصد بین الاقوامی مسافروں کے لیے آسان اور محفوظ ڈیجیٹل رابطہ یقینی بنانا ہے۔
اس ڈیجیٹل ای سم کے ذریعے صارفین کو موبائل نیٹ ورک تبدیل کرنے یا بین الاقوامی ڈیٹا پیکیج کے حصول کے لیے علیحدہ سم خریدنے کی ضرورت نہیں رہے گی۔
صارفین اپنے موبائل فون کے ذریعے براہ راست بین الاقوامی ڈیٹا سہولت کو فعال کر سکتے ہیں، وہ بھی بغیر کسی جسمانی سم کی تبدیلی کے۔ ویزا کے جدید اور محفوظ نظام کی پشت پناہی اور مختلف جدید موبائل آلات سے ہم آہنگی کے باعث یہ سہولت خاصی موثر اور قابلِ اعتماد تصور کی جا رہی ہے۔
میزان بینک کے وہ صارفین جو اس سہولت کے اہل ہوں گے، انہیں 21 دن کے لیے دنیا کے 150 سے زائد ممالک میں تیز رفتار انٹرنیٹ ڈیٹا کی 3 جی بی مقدار مفت فراہم کی جائے گی جبکہ اس سے زائد استعمال کی صورت میں مزید ڈیٹا خریدنے پر 25 فیصد رعایت بھی دی جائے گی۔
میزان بینک کے صارف فنانس کے گروپ ہیڈ، سید افتخار الحق نے اس موقع پر کہا کہ ہمیں خوشی ہے کہ ہم اپنے باوقار صارفین کے لیے یہ نئی طرز کی سہولت متعارف کرا رہے ہیں جس کے ذریعے وہ بیرون ملک سفر کے دوران کسی بھی قسم کی مقامی سم خریدنے کی زحمت یا غیر محفوظ وائی فائی پر انحصار کیے بغیر رابطے میں رہ سکتے ہیں۔
انہوں نے مزید کہا کہ میزان بینک پاکستان کا پہلا بینک ہے جس نے عالمی ڈیٹا رومنگ کی یہ ڈیجیٹل سہولت براہ راست اپنے خصوصی درجے کے ڈیبٹ کارڈ کے ساتھ مربوط کر دی ہے۔
ویزاکمپنی کے پاکستان و افغانستان کے کنٹری مینیجر عمر خان نے بھی اس شراکت داری پر تبصرہ کرتے ہوئے کہا کہ جیسے جیسے عالمی سفر میں اضافہ ہو رہا ہے، محفوظ اور آسان ڈیجیٹل رابطہ پہلے سے کہیں زیادہ اہمیت اختیار کر چکا ہے۔
انہوں نے کہا کہ ویزا کی عالمی ای سم کو میزان بینک کے وی آئی پی درجے کے ڈیبٹ کارڈ میں شامل کر کے ہم صارفین کو ایک ایسی سہولت فراہم کر رہے ہیں جو انہیں دنیا بھر میں جسمانی سم کے بغیر اور غیر محفوظ نیٹ ورکس کے خطرے سے بچاتے ہوئے رابطے میں رہنے کی مکمل آزادی دیتی ہے۔
عمر خان نے مزید وضاحت کی کہ 2018 سے اب تک عالمی موبائل ڈیٹا کے استعمال میں سات گنا سے زائد اضافہ ہو چکا ہے، اس لیے ایسی جدید سہولتیں نہایت ضروری ہو چکی ہیں تاکہ صارفین دنیا کے بدلتے ہوئے ڈیجیٹل تقاضوں کے ساتھ ہم آہنگ رہ سکیں۔