پھیپھڑوں کے کینسر کی ابتدائی علامات پیروں میں بھی ظاہر ہوسکتی ہیں، ماہرین

اسلام آباد (قدرت روزنامہ)پھیپھڑوں کے کینسر کی ابتدائی علامات صرف سانس لینے میں دشواری، کھانسی یا سینے کے درد تک محدود نہیں ہوتیں، بلکہ یہ جسم کے دیگر حصوں، خصوصاً ٹانگوں اور پیروں میں بھی ظاہر ہوسکتی ہیں۔
ماہرین کے مطابق ٹانگوں یا پیروں میں سوجن، درد، رنگت میں تبدیلی، جھنجھناہٹ، یا پٹھوں کی کمزوری جیسی شکایات بعض اوقات اس مرض کے ابتدائی اشارے ثابت ہوسکتی ہیں۔
ٹانگوں یا پیروں میں سوجن اس وقت ظاہر ہوتی ہے جب جسم کے ٹشوز میں مائع جمع ہونے لگتا ہے، جو شریانوں یا لمفی نالیوں کے متاثر ہونے کی علامت ہوسکتا ہے، اس کے علاوہ ایک ٹانگ میں درد، گرمی یا سرخی محسوس ہونا خون کے جمنے کی نشاندہی کرتا ہے، جو پھیپھڑوں کے کینسر کے مریضوں میں عام طور پر دیکھا گیا ہے۔
رپورٹ کے مطابق جلد کی رنگت میں تبدیلی، مثلاً پیلاہٹ، نیلاہٹ یا سرخی، خون میں آکسیجن کی کمی یا خون کی روانی میں رکاوٹ کی علامت ہوسکتی ہے، بعض مریضوں میں کیموتھراپی کے دوران یا بعد میں جھنجھناہٹ، جلن، یا چلنے میں دشواری جیسے اثرات بھی سامنے آتے ہیں، جو اعصابی نظام پر علاج کے اثرات کی وجہ سے ہوتے ہیں۔
کچھ کیسز میں ٹخنوں یا پیروں کے ناخنوں کی ساخت میں تبدیلی دیکھی گئی ہے، جو خون میں طویل عرصے تک آکسیجن کی کمی یا پھیپھڑوں کی بیماریوں سے منسلک ہوسکتی ہے۔
ڈاکٹرز کے مطابق اگر کسی شخص کو ٹانگوں یا پیروں میں سوجن، درد، یا رنگت میں غیر معمولی تبدیلی مستقل طور پر محسوس ہو تو اسے فوری طور پر ڈاکٹر سے رجوع کرنا چاہیے، بروقت تشخیص سے نہ صرف علاج کے امکانات بڑھ جاتے ہیں بلکہ جان بچانے کے امکانات بھی نمایاں طور پر بہتر ہوسکتے ہیں۔