ایچ ڈی پی کی گیس بحران پر سخت مذمت: “کوئٹہ پر گیس کمپنی کے عوام دشمن اہلکار مسلط”
کوئٹہ ( ڈیلی قدرت ) ہزارہ ڈیموکریٹک پارٹی (ایچ ڈی پی) نے سردیوں کی آمد کے ساتھ ہی کوئٹہ شہر اور گرد و نواح میں گیس پریشر کی کمی اور مکمل بندش پر گیس کمپنی کے اہلکاروں کی کارکردگی کو “عوام دشمن اور مکمل انسانیت دشمن طرز عمل” قرار دیتے ہوئے شدید مذمت کی ہے۔ پارٹی کے مرکزی بیان میں کہا گیا ہے کہ جی ایم سمیت کئی آفیسران کوئٹہ میں مستقل قیام نہیں کرتے اور انہیں سرد علاقوں کے عوام کے مسائل کا کوئی اندازہ نہیں ہے، جس کی وجہ سے وہ گیس کی بندش کو سنجیدہ نہیں لیتے۔ ایچ ڈی پی نے زور دیا کہ کوئٹہ کے سرد علاقوں کے صارفین کے لیے گیس محض چولہا جلانے کا ذریعہ نہیں بلکہ ایندھن کا کام دیتی ہے جس سے بچوں، بوڑھوں اور بیماروں کی زندگیاں وابستہ ہیں۔ پارٹی نے کہا کہ علمدار روڈ اور ہزارہ ٹاؤن میں سالوں سے گیس پریشر کی شکایات موجود ہیں، لیکن متعدد احتجاجی مظاہروں اور اسمبلی میں آواز اٹھانے کے باوجود کمپنی پر کوئی اثر نہیں ہوا۔ پارٹی نے موجودہ اسمبلیوں میں بیٹھے “جعلی لوگوں” پر مایوسی کا اظہار کرتے ہوئے حقیقی سیاسی جماعتوں اور عوام کو خود میدان عمل میں آنے کا انتباہ دیا ہے اور گیس کی بندش فوری ختم کرنے اور پریشر میں اضافے کا مطالبہ کیا ہے۔
