جنوبی وزیرستان کے کیڈٹ کالج وانا پر دہشتگردوں کا بزدلانہ حملہ ناکام ‘ 2 حملہ آور ہلاک ‘ 3 محصور ‘ افغستان سے ہدایات لے رہےہیں ‘ آئی ایس پی آر

راولپنڈی ( قدرت نیوز ) جنوبی وزیرستان کے کیڈٹ کالج وانا پر دہشت گردوں نے حملہ کیا، تاہم سکیورٹی فورسز نے بروقت کارروائی کرتے ہوئے حملہ ناکام بنا دیا اور دو خوارج کو ہلاک کردیا۔آئی ایس پی آر کے مطابق یہ حملہ بھارتی سرپرستی یافتہ گروپ “فتنہ الخوارج” نے کیا۔ دہشت گردوں نے کالج کی سکیورٹی توڑنے کی کوشش کی، مگر سکیورٹی فورسز نے ان کے منصوبے کو ناکام بنادیا۔مایوسی میں حملہ آوروں نے مین گیٹ پر بارودی مواد سے بھری گاڑی ٹکرا دی، جس سے گیٹ اور ملحقہ انفراسٹرکچر کو نقصان پہنچا۔آئی ایس پی آر کے مطابق تین دہشت گرد کالج کے ایڈمن بلاک میں محصور ہیں اور افغانستان میں موجود اپنے آقاؤں سے رابطے میں ہیں۔
ترجمان پاک فوج کے مطابق:”خوارج اے پی ایس جیسے وحشیانہ اقدام کو دہرانے کی کوشش کر رہے تھے، مگر ناکام رہے۔”
آئی ایس پی آر کا کہنا ہے کہ پاکستان دہشتگردوں اور افغانستان میں موجود ان کی قیادت کے خلاف جواب کا حق محفوظ رکھتا ہے۔بیان میں کہا گیا کہ افغانستان میں دہشتگرد گروہوں کی موجودگی طالبان کے دعوؤں کے برعکس ہے۔عزمِ استحکام کے تحت کلیئرنس آپریشن جاری ہے، اور پاک فوج نے واضح کیا کہ”ملک سے بیرونی سرپرستی یافتہ دہشت گردی کا مکمل خاتمہ کیا جائے گا۔”