بلوچستان شدید سردی کی لپیٹ میں، متعدد علاقے نقطہ انجماد سے نیچے درجہ حرارت میں ریکارڈ کمی

کوئٹہ(قدرت روزنامہ)بلوچستان کے شمالی اور بالائی اضلاع شدید سردی کی لپیٹ میں آ گئے ہیں، جہاں کئی مقامات پر درجہ حرارت نقطہ انجماد سے بھی نیچے گر گیا ہے۔ محکمہ موسمیات کے مطابق سرد ہواں کے تسلسل کے باعث صوبے بھر میں سردی کی شدت میں نمایاں اضافہ ہوا ہے اور آئندہ 24 گھنٹوں تک موسم خشک اور سخت سرد رہنے کا امکان ہے۔محکمہ موسمیات کے مطابق کوئٹہ میں کم سے کم درجہ حرارت صفر ڈگری سینٹی گریڈ ریکارڈ کیا گیا، جبکہ قلات میں پارہ منفی 1 تک گر گیا۔
زیارت اور کوئٹہ کے بالائی علاقوں میں صورتحال مزید شدید ہے جہاں درجہ حرارت منفی 5 ڈگری تک پہنچ گیا ہے، جس کے باعث معمولات زندگی متاثر ہو رہے ہیں۔ شہریوں کو خاص طور پر صبح اور رات کے وقت شدید مشکلات کا سامنا ہے۔ژوب میں کم سے کم درجہ حرارت 5 ڈگری ریکارڈ کیا گیا جبکہ میدانی اضلاع میں بھی سردی کی لہر برقرار ہے۔ محکمہ موسمیات کے مطابق سبی میں کم سے کم درجہ حرارت 13 ڈگری، تربت میں 15، نوکنڈی میں 8 اور چمن میں 4 ڈگری سینٹی گریڈ ریکارڈ کیا گیا۔
یہ درجہ حرارت گزشتہ ہفتے کے مقابلے میں نمایاں کمی ظاہر کرتے ہیں۔ساحلی اضلاع بھی ٹھنڈی ہواں سے متاثر ہوئے ہیں، گوادر میں کم سے کم 14 ڈگری جبکہ جیوانی میں 17 ڈگری سینٹی گریڈ ریکارڈ کیا گیا۔ سردی بڑھنے کے ساتھ شہریوں نے گرم کپڑوں اور گرم مشروبات کا استعمال بڑھا دیا ہے۔ماہرین موسمیات نے خبردار کیا ہے کہ آئندہ 24 گھنٹوں کے دوران زیارت، قلات، پشین، مسلم باغ، کوئٹہ اور ملحقہ وادیوں میں سردی مزید بڑھنے کا امکان ہے اور درجہ حرارت مزید گر سکتا ہے۔
شدید سردی کے پیش نظر ڈاکٹرز نے شہریوں کو احتیاطی تدابیر اختیار کرنے کی ہدایت کی ہے۔ماہرین کے مطابق:صبح اور رات کے اوقات میں موٹے کپڑے، جیکٹ، ٹوپی، جرابیں اور دستانے کا استعمال لازمی کیا جائے۔بچوں اور بزرگوں کو خصوصی حفاظتی لباس پہنایا جائے۔گیس یا کوئلے کے ہیٹر والے کمروں میں مناسب وینٹیلیشن ضروری ہے تاکہ دم گھٹنے کے واقعات سے بچا جا سکے۔خشک سرد موسم میں پانی کا استعمال کم نہ کریں کیونکہ پانی کی کمی جلد اور سانس کی بیماریوں کا خدشہ بڑھا دیتی ہے۔
سوپ، چائے، شہد، ادرک، گرم دودھ اور خشک میوہ جات مدافعتی نظام مضبوط بنانے میں مدد دیتے ہیں۔دمہ، دل کے مریض اور بزرگ ٹھنڈی ہوا سے خصوصی طور پر بچیں کیونکہ شدید سردی میں سانس کی بیماریوں میں اضافہ ہوتا ہے۔محکمہ موسمیات اور طبی ماہرین نے شہریوں کو ہدایت کی ہے کہ غیر ضروری باہر نکلنے سے گریز کریں اور موسم کے مطابق احتیاطی تدابیر اختیار کریں۔