بلوچستان اسمبلی کا ان کیمرہ اجلاس، صوبے میں امن و امان کی صورتحال زیر بحث

کوئٹہ (قدرت روزنامہ)بلوچستان صوبائی اسمبلی کا ان کیمرہ اجلاس بروز جمعرات، اسپیکر کیپٹن (ر)عبد الخالق خان اچکزئی کی زیر صدارت اسمبلی ہال میں منعقد ہوا۔ اجلاس کا آغاز رخصت کی درخواستوں سے ہوا، جنہیں سیکرٹری اسمبلی طاہر شاہ کا کر نے پیش کیا اور اسپیکر نے منظور کر لیا۔ اجلاس میں حاجی نور محمد دمڑ اور سردار کو بیار ڈومکی نے رخصت کی درخواستیں دی تھیں جو منظور کی گئیں۔اجلاس میں قائد ایوان نے اراکین کو صوبے میں امن و امان کی موجودہ صورتحال پر تفصیلی ان کیمرہ بریفنگ دی۔ اس دوران آئی جی پولیس اور متعلقہ حکام نے مختلف اضلاع میں قانون و نظم، دہشت گردی کے واقعات، جرائم کی شرح اور حفاظتی اقدامات کے بارے میں جامع رپورٹ پیش کی۔ قائد ایوان نے اراکین سے کہا کہ وہ اس اجلاس میں کھل کر تجاویز اور مشورے پیش کریں تاکہ حکومت اور وفاقی ادارے صوبے میں امن و امان کی صورتحال بہتر بنانے کے لیے مثر اقدامات کر سکیں۔قائد ایوان نے مزید کہا کہ اس اجلاس کا مقصد عوامی مسائل اور جرائم کی صورتحال پر حقیقی معلومات فراہم کرنا اور عملی حل تلاش کرنا ہے، نہ کہ بحث اور تنقید کی محفل بنانا۔ اراکین کو ہدایت دی گئی کہ اجلاس کے دوران موبائل فونز بند رکھیں اور تمام گفتگو صرف اسمبلی ہال کے اندر رہ کر کی جائے تاکہ معلومات محفوظ اور شفاف انداز میں فراہم کی جائیں۔اس اجلاس کے اختتام پر اسپیکر نے اعلان کیا کہ اسمبلی کا اجلاس بروز جمعہ، 21 نومبر 2025، سہ پہر 3 بجے تک ملتوی کیا جاتا ہے۔ اجلاس شام 4:05 پر اختتام پذیر ہوا، جس میں اراکین نے اپنی تجاویز اور سفارشات بھی تحریری طور پر پیش کیں تاکہ صوبے میں قانون و نظم کی صورتحال میں بہتری لائی جا سکے۔