ریکوڈک سمیت تمام معدنی وسائل تعلیم، صحت اور ترقی پر خرچ کیے جائیں گے، میر ظہور بلیدی

کوئٹہ(ڈیلی قدرت)پاکستان پیپلز پارٹی کے صوبائی وزیر پلاننگ اینڈ ڈیولپمنٹ میر ظہور بلیدی نے سماجی رابطے کی ویب سائٹ پر اپنے بیان میں کہا ہے کہ حکومت بلوچستان کے عوام کی بہتری، فلاح و ترقی کے لیے وسائل بڑھانے اور آمدنی بڑھانے کی بھرپور کوشش کر رہی ہے۔انہوں نے ریکودک منصوبے سے متعلق کہا کہ گزشتہ اسمبلی اور حکومت نے اس منصوبے میں 25 فیصد حصہ حاصل کیا ہے اور یقین دہانی کرائی کہ معدنی وسائل سمیت تمام وسائل کو تعلیم، صحت اور بنیادی ڈھانچے کی ترقی کے لیے استعمال کیا جائے گا۔میر ظہور بلیدی نے سیاسی رہنماں پر زور دیا کہ کامیابی وسائل کے موثر استعمال اور آمدنی کے جمع کرنے میں ہے، نہ کہ سست روی اور موجودہ صورتحال پر گزارا کرنے میں۔ انہوں نے کہا کہ صوبائی حکومت اپنے وسائل کو 1997 اور 2013 کی قومی حکومتوں کے مقابلے میں بہتر انداز میں استعمال کرے گی۔صوبائی وزیر نے مزید کہا کہ بلوچستان کے عوام نے 1997 کے معاہدوں سے جو فوائد حاصل کیے، وہ تحقیق کرنے والے بخوبی جانتے ہیں، اس لیے موجودہ حکومت موثر اقدامات کے ذریعے وسائل کی بہتر استعمال پر یقین رکھتی ہے۔