آسٹریلیا میں شدید ہیٹ ویو، درجہ حرارت 50 ڈگری کے قریب پہنچ گیا

کینبرا (قدرت روزنامہ) آسٹریلیا اس وقت شدید اور طویل گرمی کی لہر کی لپیٹ میں ہے، جہاں ملک کے مختلف حصوں میں درجہ حرارت ریکارڈ سطح کے قریب پہنچ گیا ہے۔ منگل کے روز بعض علاقوں میں درجہ حرارت تقریباً 50 ڈگری سینٹی گریڈ یا 122 فارن ہائیٹ تک ریکارڈ کیا گیا، جس کے باعث معمولاتِ زندگی شدید متاثر ہوئے۔
اے بی سی نیوز کے مطابق ریاست وکٹوریہ کے دیہی قصبوں ہوپ ٹاؤن اور والپیُوپ میں ابتدائی طور پر 48.9 ڈگری سینٹی گریڈ درجہ حرارت ریکارڈ کیا گیا، جو اگر تصدیق ہو گیا تو 2009 کے اس ریکارڈ کو توڑ دے گا جب اسی دن ریاست میں تباہ کن جنگلاتی آگ کے نتیجے میں 173 افراد ہلاک ہوئے تھے۔ منگل کی اس گرمی کی لہر کے دوران کسی جانی نقصان کی اطلاع نہیں ملی، تاہم وکٹوریہ کی انتظامیہ نے شہریوں کو محتاط رہنے کی ہدایت کی ہے کیونکہ ریاست میں تین جگہ جنگلاتی آگ بے قابو ہو چکی ہیں۔
ریاست کا سب سے بڑا شہر میلبورن بھی اپنی تاریخ کے گرم ترین دنوں میں سے ایک کے قریب پہنچ گیا۔ شدید گرمی کا سب سے واضح منظر میلبورن پارک میں دیکھا گیا، جہاں آسٹریلین اوپن ٹینس ٹورنامنٹ کے باہر موجود ہجوم تقریباً غائب ہو گیا اور جگہ سنسان منظر پیش کرنے لگی، کیونکہ درجہ حرارت خطرناک حد تک بڑھ چکا تھا۔
ٹورنامنٹ کے اندر منتظمین نے شدید گرمی سے نمٹنے کے لیے ہنگامی اقدامات نافذ کر دیے۔ مرکزی سٹیڈیمز کی کھلنے اور بند ہونے والی چھتیں بند کر دی گئیں جبکہ بغیر چھت والے بیرونی کورٹس پر میچز ملتوی کر دیے گئے۔ منگل کو آرینا سبالینکا اور ایوا جووچ کے درمیان کھیلے گئے کوارٹر فائنل کے دوران، جو شدید دھوپ میں کھیلا جانے والا آخری میچ تھا، کھلاڑی وقفوں کے دوران سر پر برف کے پیک اور چہرے کے سامنے پورٹیبل پنکھے رکھے ہوئے نظر آئیں۔
میچ کی کوریج کرنے والے فوٹوگرافروں کو بھی منتظمین کی جانب سے کشن فراہم کیے گئے تاکہ وہ بیٹھتے وقت گرمی سے متاثر نہ ہوں، جبکہ کیمروں کو تولیوں سے ڈھانپا گیا تاکہ شدید حرارت کے باعث آلات خراب نہ ہوں یا ہاتھ جلنے سے بچائے جا سکیں۔ شائقین بڑی دھند چھوڑنے والی پنکھوں کے سامنے کھڑے ہونے یا ایئرکنڈیشنڈ حصوں میں پناہ لینے پر مجبور ہو گئے۔
ایونٹ میں شرکت کرنے والوں کی تعداد میں بھی نمایاں کمی دیکھی گئی۔ جہاں پیر کے روز دن کے سیشن میں تقریباً 50 ہزار افراد موجود تھے، وہیں منگل کو یہ تعداد کم ہو کر 21 ہزار رہ گئی، کیونکہ لوگوں نے صحت سے متعلق سرکاری انتباہات کو سنجیدگی سے لیا اور گھروں میں رہنے کو ترجیح دی۔
محکمہ موسمیات کے مطابق بدھ کے روز درجہ حرارت میں کمی متوقع ہے، تاہم گرمی کی یہ لہر اختتام ہفتہ تک برقرار رہنے کا امکان ہے۔ یہ ہیٹ ویو رواں ماہ کے آغاز میں آنے والی ایک اور شدید گرمی کے بعد سامنے آئی ہے، جو آسٹریلیا کی تاریخ کی گرم ترین گرمیوں میں سے ایک قرار دی جا رہی ہے۔ پیر کے روز نیو ساؤتھ ویلز اور ساؤتھ آسٹریلیا کے بعض علاقوں میں بھی ریکارڈ درجہ حرارت ریکارڈ کیا گیا، جو 2019 کی تباہ کن جنگلاتی آگ والے موسمِ گرما کے ریکارڈ سے بھی تجاوز کر گیا۔