سائرہ یوسف کا شہروز سبزواری کیساتھ نئی فلم میں رومانٹک گانا ہوگا
اسلام آباد (قدرت روزنامہ)پاکستانی معروف اداکارہ سائرہ یوسف اور اُن کے سابق شوہر، اداکار شہروز سبزواری کی آنے والی نئی فلم میں ایک رومانٹک گانا بھی ہوگا۔
سائرہ یوسف نے حال ہی میں ایک ٹاک شو میں بطور مہمان شرکت کی، اس دوران انہوں نے اپنے آنے والے اور حالیہ ٹی وی پر نشر کیے جانے والے پروجیکٹس سے متعلق بھی بات کی۔
سائرہ یوسف نے بتایا کہ ’اُن کے سابق شوہر، اداکار شہروز سبزواری کے ساتھ بننے والی فلم کا تقریباً کام مکمل ہو چکا ہے، صرف ایک گانے کی عکس بندی تاخیر کا شکار ہے۔‘
View this post on Instagram
سائرہ یوسف کا کہنا تھا کہ ’اُنہیں واضح معلوم نہیں ہے کہ اس گانے کی عکس بندی کیوں تاخیر کا شکار ہے، یا تو بجٹ کی کمی یا پھر تاریخوں کی عدم فراہمی بھی ہوسکتی ہے۔‘سائرہ یوسف نے اس دوران انکشاف کیا کہ ’یہ فلم 2022ء میں ریلیز ہوگی جبکہ تاخیر کا شکار ہونے والا گانا ایک رومانٹک سانگ ہوگا۔‘سائرہ یوسف کا فلم سے متعلق بات کرتے ہوئے مزید کہنا تھا کہ یہ فلم بہت ہلکی پھلکی اور رومانٹک مزاج کی ہوگی۔
واضح رہے کہ سائرہ اور شہروز میں علیحدگی کو کافی عرصہ بیت گیا ہے مگر اب تک سائرہ کی جانب سے اپنے سوشل میڈیا اکاؤنٹ پر اپنے یوزر نیم سے شہروز سبزواری کا نام نہیں ہٹایا گیا ہے۔دوسری جانب شہروز سبزواری نے گزشتہ سال کورونا وائرس لاک ڈاؤن کے دوران اداکارہ و ماڈل صدف کنول سے شادی کرلی تھی۔شہروز سبزواری معروف اداکار بہروز سبزواری کے بیٹے ہیں اور صدف کنول کے ساتھ یہ دوسری شادی ہے۔
