میں عاصم اظہر کا نام لوں؟ ہانیہ عامر کے شرارتی جواب سے سوشل میڈیا پر ہنگامہ مچ گیا

اسلام آباد (قدرت روزنامہ)پاکستان کی معروف اداکارہ ہانیہ عامر نے ایک تقریب میں عاصم اظہر سے متعلق ایسا شرارتی اور دلکش جواب دیا کہ محفل اور سوشل میڈیا پر ہنگامہ مچ گیا۔
ہانیہ عامر سے حالیہ ایک پروگرام میں ایک خاتون صارف نے پوچھا کہ ان کے پسندیدہ گلوکار کون ہیں، تو انہوں نے مسکراتے ہوئے مزاحیہ انداز میں کہا کہ کیا آپ چاہتے ہیں کہ میں عاصم اظہر کا نام لوں؟
یہ مختصر مگر دل لبھانے والا جواب محفل میں قہقہوں کا باعث بنا اور ویڈیو فوراً سوشل میڈیا پر وائرل ہوگئی۔ صارفین نے اس پر ہزاروں ری ایکشنز اور شیئرز کیے، اور مداحوں میں ہانیہ عامر اور گلوکار عاصم اظہر کے تعلقات پر دوبارہ بحث چھڑ گئی۔
اداکارہ کے اس جواب نے نہ صرف ان کی شرارت بھری شخصیت کو اجاگر کیا بلکہ سوشل میڈیا پر مداحوں کو خوشگوار حیرت میں ڈال دیا۔ اگرچہ دونوں نے رسمی طور پر کوئی بیان نہیں دیا، لیکن صارفین کے اندازے اور قیاس آرائیاں زور پکڑ چکی ہیں۔
واضح رہے کہ گزشتہ چند دنوں سے سوشل میڈیا پر ہانیہ عامر اور عاصم اظہر کی ممکنہ شادی کی خبریں گردش کر رہی ہیں۔ مداحوں کی دلچسپی اس وقت مزید بڑھ گئی جب ہانیہ عامر نے ایک مداح کے سوال کے جواب پر اپنی شادی کی تاریخ کی وضاحت کرتے ہوئے کہا کہ نکاح جمعے کے روز دوپہر ہوگا۔
ان کے اس اعلان کے بعد مداحوں میں خوشی اور جوش و خروش دیکھنے میں آیا، اور سوشل میڈیا پر مداح مختلف ردعمل کا اظہار کر رہے ہیں۔ کچھ مداح اس بات پر حیرت زدہ ہیں کہ آیا یہ واقعی اعلان ہے یا مزاحیہ انداز میں بات کی گئی۔
واضح رہے کہ ہانیہ اور عاصم دونوں شوبز کی دنیا کے معروف فنکار ہیں اور ان کے تعلقات، علیحدگی اور شادی کی خبریں پہلے بھی میڈیا میں زیرِ بحث رہی ہیں۔ حال ہی میں وہ ایک دوسرے کی خاندانی تقریبات میں بھی شریک ہوئے، جس کی تصاویر انہوں نے سوشل میڈیا پر بھی شیئر کیں، جس سے مداحوں میں تجسس مزید بڑھ گیا ہے۔