اضلاع کی نئی تقسیم ‘بلوچ دشمنی’ اور فساد کی کوشش ہے، نواب اسلم رئیسانی کا اسمبلی سے احتجاجی واک آؤٹ

(ڈیلی قدرت کوئٹہ) بلوچستان اسمبلی کے حالیہ اجلاس میں سابق وزیراعلیٰ نواب اسلم رئیسانی نے مستونگ اور کچھی کی نئی انتظامی تقسیم کو یکسر مسترد کرتے ہوئے ایوان سے واک آؤٹ کیا ہے۔ نواب اسلم رئیسانی نے خطاب کرتے ہوئے کہا کہ ضلع مستونگ کو کوئٹہ اور کچھی کو سبی ڈویژن میں ضم کرنے کا فیصلہ زمینی حقائق کے منافی ہے، حالانکہ ان اضلاع میں مختلف برادر اقوام صدیوں سے آباد ہیں اور ان کے اپنے تاریخی و جغرافیائی رشتے ہیں۔ انہوں نے سنگین الزام عائد کیا کہ اضلاع کی اس تبدیلی کے پیچھے برادر اقوام کے درمیان فساد ڈالنے کی منظم کوشش نظر آتی ہے؛ ان کا کہنا تھا کہ محض کاغذوں میں اضلاع تبدیل کرنے سے مسائل حل نہیں ہوں گے بلکہ اس سے سماجی ڈھانچہ متاثر ہوگا۔ نواب اسلم رئیسانی نے دوٹوک الفاظ میں واضح کیا کہ وہ اس فیصلے کو کسی صورت قبول نہیں کریں گے اور ایوان کے اندر اور باہر ہر اس اقدام کی بھرپور مذمت کریں گے جسے وہ “بلوچ دشمن” سمجھتے ہیں۔