رمضان پیکج کے لیے بینک اکاؤنٹ کی شرط ختم، کے پی حکومت کا فیصلہ

پشاور(قدرت روزنامہ)خیبر پختونخواہ حکومت نے رمضان پیکج 2026 کے تحت 12,500 روپے مالی امداد حاصل کرنے کے لیے بینک اکاؤنٹ کی شرط ختم کرنے کا اعلان کر دیا ہے۔
تفصیلات کے مطابق، صوبائی حکومت نے مستحقین کے لیے بینک اکاؤنٹ لازمی رکھنے کی شرط سرکاری طور پر ختم کر دی ہے اور اس حوالے سے رسمی نوٹیفکیشن بھی جاری کر دیا گیا ہے۔
خیبر پختونخواہ حکومت نے قبل ازیں مستحق خاندانوں کے لیے 12,500 روپے کی مالی امداد کا اعلان کیا تھا، لیکن اس کے ساتھ شرط عائد کی گئی تھی کہ تمام مستحقین کے پاس بینک اکاؤنٹ ہونا لازمی ہے۔
اس فیصلے پر صوبے بھر میں شدید ردعمل سامنے آیا، شہریوں اور مقامی نمائندگان نے اسے غیر حقیقی شرط قرار دیا۔ دور دراز اور پسماندہ علاقوں میں رہنے والے غریب خاندانوں کے لیے بینک کی سہولیات تک رسائی تقریباً ناممکن تھی، جبکہ دیہات میں رہنے والے اکثر لوگ نہ تو بینک اکاؤنٹ رکھتے ہیں اور نہ ہی پیچیدہ بینکنگ طریقہ کار سے واقف ہیں۔
نیا اور آسان طریقہ کار
حکومت نے رجسٹریشن کے عمل میں تبدیلی کرتے ہوئے فیصلہ کیا ہے کہ اب مستحقین بینک اکاؤنٹ کی بجائے اپنے قومی شناختی کارڈ (CNIC) اور موبائل فون نمبر کی بنیاد پر رجسٹر ہوں گے۔ اس فیصلے سے صوبے میں ہزاروں خاندان مستحقین کی فہرست سے محروم ہونے کے خطرے سے بچ جائیں گے۔
حکام کا کہنا ہے کہ یہ نیا طریقہ کار شفافیت میں اضافہ، زیادہ افراد تک پہنچ اور بروقت مالی امداد فراہم کرنے میں مددگار ثابت ہوگا۔