گھی اور کوکنگ آئل کی قیمتوں میں تیز اضافہ، شہریوں کی مشکلات بڑھ گئیں

لاہور(قدرت روزنامہ)ملک میں مہنگائی کی لہر بدستور جاری ہے اور روزمرہ استعمال کی اشیائے ضروریہ کی قیمتوں میں مسلسل اضافہ دیکھنے میں آ رہا ہے۔ حالیہ دنوں میں جاری مہنگائی کے باعث گھی اور کوکنگ آئل کی قیمتوں میں بھی نمایاں اضافہ ہوگیا ہے جس سے شہریوں کی مشکلات میں مزید اضافہ ہو گیا ہے۔
لاہور کی اوپن مارکیٹ میں گریڈ ٹو گھی اور کوکنگ آئل کی قیمت میں فی کلو 20 روپے اضافہ کر دیا گیا ہے۔ تاجروں کے مطابق حالیہ اضافے کے بعد گریڈ ٹو گھی اور آئل کی قیمت 545 روپے فی کلوگرام تک پہنچ گئی ہے۔ قیمتوں میں اچانک اضافے نے گھریلو بجٹ کو بری طرح متاثر کیا ہے۔
مارکیٹ ذرائع کا کہنا ہے کہ گھی اور آئل کی قیمتوں میں اضافے کی بنیادی وجہ خام مال کی قیمتوں میں اضافہ اور ترسیلی اخراجات میں بڑھوتری ہے، جس کے باعث مارکیٹ میں نرخ بڑھ رہے ہیں۔
دوسری جانب شہریوں کا کہنا ہے کہ کھانے پینے کی اشیا پہلے ہی مہنگی ہو چکی ہیں اور اب گھی اور آئل کی قیمتوں میں اضافے نے ان کی مشکلات میں مزید اضافہ کر دیا ہے۔
گھریلو خواتین کے مطابق پہلے ہی کھانا پکانے کے اخراجات بہت زیادہ ہو چکے ہیں اور گھی و آئل کی قیمتوں میں مسلسل اضافہ عام آدمی کی خریداری کی قوت کو متاثر کر رہا ہے۔
صارفین نے حکومتِ پنجاب اور متعلقہ اداروں سے مطالبہ کیا ہے کہ قیمتوں میں اضافے کا فوری نوٹس لیا جائے اور مارکیٹ میں اشیائے خور و نوش کی قیمتوں کو کنٹرول کرنے کے لیے مؤثر اقدامات کیے جائیں تاکہ عوام کو کچھ ریلیف مل سکے۔