کوئٹہ: گیس پائپ لائن تباہ، شہر کا بڑا حصہ گیس سے محروم، آسمان چھوتے شعلوں نے شہریوں میں خوف و ہراس پھیلا دیا

کوئٹہ (ڈیلی قدرت نیوز) صوبائی دارالحکومت کے علاقے اخترآباد کے قریب نامعلوم افراد نے دھماکے کے ذریعے گیس پائپ لائن کو تباہ کر دیا ہے، جس کے نتیجے میں پائپ لائن میں شدید آگ بھڑک اٹھی۔ دھماکے کے بعد علاقے میں شدید خوف و ہراس پھیل گیا جبکہ آگ کے بلند ہوتے شعلے دور دور تک دیکھے گئے۔ اس تخریبی واقعے کے باعث مغربی بائی پاس اور اس سے ملحقہ علاقوں میں گیس کی فراہمی فوری طور پر معطل کر دی گئی ہے۔ حکام کے مطابق گیس سپلائی بحال کرنے کے لیے صورتحال کا جائزہ لیا جا رہا ہے اور ہونے والے نقصان کا تخمینہ لگایا جا رہا ہے۔ واقعے کی اطلاع ملتے ہی پولیس اور دیگر قانون نافذ کرنے والے ادارے موقع پر پہنچ گئے جبکہ گیس انتظامیہ کو بھی فوری طور پر طلب کر لیا گیا ہے تاکہ لگی ہوئی آگ پر قابو پایا جا سکے اور متاثرہ پائپ لائن کی مرمت کا کام شروع کیا جا سکے۔ سکیورٹی اداروں نے واقعے کی باقاعدہ تحقیقات کا آغاز کر دیا ہے اور اس بات کا باریک بینی سے جائزہ لیا جا رہا ہے کہ دھماکہ تخریب کاری کا نتیجہ تھا یا کسی اور وجہ سے پیش آیا۔