بانی پی ٹی آئی اور بشریٰ بی بی کی رہائی کیلئے کوششیں تیز کردیں: بیرسٹر گوہر

راولپنڈی (قدرت روزنامہ)چیئرمین پی ٹی آئی بیرسٹر گوہر علی نے کہا کہ بانی پی ٹی آئی عمران خان اور بشریٰ بی بی کی رہائی کے لیے کوششیں جاری ہیں اور اس حوالے سے اقدامات تیز کر دیے گئے ہیں۔
راولپنڈی میں میڈیا سے گفتگو کرتے ہوئے بیرسٹر گوہر علی خان نے کہا ہے کہ بشریٰ بی بی کی طبیعت ناساز ہے، اس لیے ان کی جلد رہائی اور بہتر علاج کو یقینی بنایا جائے، بشریٰ بی بی کی حالیہ سرجری کے بعد ان کی فیملی سے ملاقات ہوئی ہے تاہم مکمل صحتیابی تک انہیں ہسپتال منتقل کیا جانا چاہیے، ساتھ ہی انہوں نے مطالبہ کیا کہ بانی پی ٹی آئی سے اہلِ خانہ اور وکلاء کی ملاقات بھی کروائی جائے۔
سیاسی امور پر بات کرتے ہوئے بیرسٹر گوہر نے کہا کہ محمود خان اچکزئی کو بانی پی ٹی آئی کی جانب سے اہم ذمہ داریاں سونپی گئی ہیں اور پارٹی ان کے فیصلوں کی پیروی کرے گی، اگر اچکزئی کو کوئی تحفظات یا ناراضگی ہے تو اسے دور کیا جائے گا، مردان جلسے میں ان کی عدم شرکت پر انہوں نے کہا کہ اس حوالے سے ابھی بات نہیں ہوئی۔
بیرسٹر گوہر نے یہ بھی بتایا کہ ان کی سہیل آفریدی سے ملاقات ہوئی ہے، تاہم اس کی تفصیلات فی الحال شیئر نہیں کی جا سکتیں، اسلام آباد ہائیکورٹ کے احکامات کے مطابق ہر منگل کو اڈیالہ جیل جاتے ہیں۔
بین الاقوامی اور ملکی صورتحال پر بات کرتے ہوئے انہوں نے کہا کہ پاکستان کی سفارتی کامیابیاں قابلِ تعریف ہیں اور ملک کے مخالفین ہی ان سے ناخوش ہو سکتے ہیں، امید ہے عالمی سطح پر اہم شخصیات کی پاکستان آمد سے خطے میں صلح اور استحکام کو فروغ ملے گا۔
انہوں نے مزید کہا کہ ان کی خواہش ہے کہ پاکستان ترقی کرے اور عالمی سطح پر مزید عزت حاصل کرے۔