ناصر درانی کی خدمات بے نظیر انکم سپورٹ پروگرام کے سپرد کر دی گئیں، کئی مزید تقرر اور تبادلے

اسلام آباد (قدرت روزنامہ)وفاقی حکومت (Federal Government)نے بیوروکریسی میں اہم ردوبدل کرتے ہوئے سول اور پولیس افسران کے تقرر و تبادلے کر دیے ہیں۔
اسٹیبلشمنٹ ڈویژن کی جانب سے جاری نوٹیفکیشن کے مطابق آئی ٹی ڈویژن میں تعینات جوائنٹ سیکریٹری نذیر احمد کو او ایس ڈی (آفیسر آن اسپیشل ڈیوٹی) بنا دیا گیا ہے۔
پولیس سروس کے گریڈ 19 کے افسر فیصل مختار، جو تقرری کے منتظر تھے، ان کی خدمات حکومت پنجاب کے سپرد کر دی گئی ہیں۔
وزارت صنعت و پیداوار کے ڈپٹی سیکریٹری علی قائم کو اسٹیبلشمنٹ ڈویژن رپورٹ کرنے کی ہدایت جاری کی گئی ہے، جبکہ تقرری کے منتظر اشفاق احمد پنہوار کو کابینہ ڈویژن میں سیکشن افسر تعینات کر دیا گیا ہے۔
اسی طرح دفاع ڈویژن کے ڈپٹی سیکریٹری ناصر درانی کی خدمات بینظیر انکم سپورٹ پروگرام کے حوالے کر دی گئی ہیں، جبکہ سیکشن افسر محمد ممتاز کا تبادلہ اسٹیبلشمنٹ ڈویژن سے مذہبی امور ڈویژن میں کر دیا گیا ہے۔
نوٹیفکیشن کے مطابق یہ تقرر و تبادلے فوری طور پر نافذ العمل ہوں گے۔